Qırımnıñ Rusiye ükümetiniñ medeniyet naziri Arina Novoselskaya Qırım akimiyeti yarımadada olğan sel sebebinden medeniy mirasqa ketirilgen zarar aqqında Moskvağa malümat berdi, dep bildire.
«Moskvanen bağlandıq, Keriç ve Kefede medeniy miras obyektlerindeki zarar aqqında malümat berdik, ihtiyaclarnı belgilep, masraf planını tizdik. [Obyektlerniñ ğayrıdan tiklenüvine] tahminen 480-500 mln ruble kerek olacaq», – dep bildirdi Novoselskaya TASS agentligine.
Onıñ malümatına köre, keçken afta Keriçte suv basqan İoann Predteçi İbadethanesi «restavratsiyağa» muhtac. Ondan ğayrı, Novoselskayanıñ aytqanına köre, Keriçte Acimuşkay taş ocaqları, Çar Qurğanı, resim galereyası ve diger obyektler «ğayrıdan tiklenmeli».
Yaltada ve şarqiy Qırımda keçken afta Qırımda olğan furtuna aqibetlerinen küreşmege devam eteler. Qırımnıñ Rusiye fevqulâde vaziyetler nazirligi idaresi bildirgenine köre, 2021 senesi iyünniñ 16-ndan 18-ne qadar küçlü yağanaqlar neticesinde 426 azbar, 356 ev, 18 içtimaiy ceetten müim obyektni suv bastı. Umumen suv basqan yerlerden 1783 insan tahliye etildi.
