Şimdi o, Saratovdaki SİZO-1-niñ mahsus blokunda buluna ve apishanege etap etilmesini bekley. Bu aqta ömür arqadaşı Sabriye Bekirova «Qırım birdemligine» bildirdi. O, aqayından «Zonatelekom» apishane bağınen mektüp aldı.
Qırımtatarı avgustnıñ 26-nda SİZOdan Novoçerkassk şeerine çıqarıldı. Ertesi künü Akim Bekirov ve daa eki qırımlı siyasiy mabüs – Rustem Seythalilov ve Asan Yanikov Volgograddaki tranzit-yollav noqtasına alıp ketirildi. Andan o, tuvğanlarına mektüp yazıp oldı.
Qırımtatarlar mabüslerni taşığan mahsus vagoda etap etildi.
Akim Bekirov – «Qırım birdemliginiñ» faali, IT telükesizligi meselelerinen oğraşqan, mahkeme esnaslarına barğan edi.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi.
2023 senesi martnıñ 18-nde Rusiyeniñ Rostov-na-Donu mahkemesi «Qırım birdemliginiñ» beş faaline üküm çıqardı. Qırımtatar faalleri Akim Bekirov, Seytveli Seytabdiyev, Rustem Seythalilov 14 yılğa, Eskender Suleymanov ve Asan Yanikov 15 yılğa koloniyada qalmasına üküm etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
