Rusiye quvetçileri 8,5 yıl sert rejimli koloniyada qalmasına üküm etilgen 53 yaşındaki Rustem Gugurikniñ qardaşı Herson vilâyetiniñ 64 yaşındaki sakini Bekir Gugurikni tuttı. Bu aqta Qırımtatar resurs merkezinde bildireler.
Mında qayd ettiler ki, aqaynıñ tutulması, Rusiye işğal etilgen topraqlarda sıq qullanğan aile repressiyalarınıñ daa bir örnegidir.
"Ekisiniñ de Noman Çelebicihan batalyonınen iç bir alâqası yoq edi, amma Rusiye akimiyeti bu uydurılğan qabaatlavlarnı qırımtatar halqını qorquzmaq ve yoq etmek içün qullana", — dep haber ete QRM.
Aq qorçalayıcılar hatırlattı ki, koloniyada Rustem Gugurik sol qulağında eşitüv qabiliyetini coydı. Bundan da ğayrı, o, kerekli tedaviylevni almay ve şiddetli nefes qıtlığından eziyet çeke.
"64 yaşındaki Bekir Gugurik de telüke astında qaldı. Onıñ yaşı ve tutuluv şaraitlerini köz ögüne alsaq, apishanede bulunması onıñ içün kerçek bir sınav ola bile. Adamnı sahte qabaatlavlar boyunca 15 yılğa qadar apis cezası bekley", — dep qayd ettiler QRM-nde.
2022 senesi oktâbr ayında Rusiyeniñ nezaretinde olğan Aqmescit şeeriniñ Kiyev rayon mahkemesi Rusiyede yasaq etilge «Noman Çelebicihan adına qırımtatar batalyonında» iştirak etüv qabaatı ile Herson vilâyetinden qırımtatar taksici Rustem Gugurikni 8,5 yıl sert apis cezasına maküm etti.
«Gratı» ukrayin neşriniñ malümatına köre, martnıñ 27-nde aqşam Rustem Gugurik apayı ve 6 yaşındaki qızınen beraber Rusiye tarafından işğal etilgen Novoalekseyevka qasabasından Qırımğa yol alğan edi. Rusiye büyük istilâsını başlamazdan evel çoq balalı baba taksici olaraq çalışqan. Cenk başlağan soñ qorantasını Bağçasaraydaki soylaprını alıp ketmege tırışqan, amma bunı yapamağan. Araba rusiye yoqlav keçitene kelir eken yolcular pasportlarını teşkerüv içün bergenler. Bundan soñ Rusiye FSB hadimleri Gugurikni yaqalağan.
Martnıñ 31-nde Rusiyeniñ nezaretinde olğan Aqmescit şeeriniñ Kiyev rayon mahkemesi Rustem Gugurikni «Noman Çelebicihan adına qırımtatar batalyonında» iştirak etüv qabaatı ile eki buçuq ayğa tevqif etkeni belli oldı.
Qayd etmek kerek ki, Rusiye FSB-si «Noman Çelebicihan qırımtatar göñülli batalyonına» Gugurik tutulğan soñ terror teşkilâtları cedveline kirsetti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
