Qırımtatar asıllı ukrainalı rejissör Ahtem Seitablayev qırımtatar uçucısı, Sovetler Birliginiñ eki defa qaramanı Amet-Han Sultan ve onıñ Ekinci cian cenkindeki ğalebeleri aqqında videonı qırımtatarca seslendirdi.
Levha InformNapalm halqara toplulığı göñüllileriniñ teşebbüsi çersivesinde azırlandı. Bu aqta InformNapalm esasçılarından biri Roman Burko Facebookta haber etti.
Böylece, 2015 senesi Ukraina ükümetiniñ teşebbüsi ile Ekinci cian cenkinde ğalebe qazanğan Ukraina devletiniñ rolü ve yeri, tarihta büyük iz qaldırğan ukrainalılarğa ğalebeleri aqqında ukraince bir sıra qısqa video çıqarıldı.
«Bu leyhanıñ videosını körgen InformNapalm halqara toplulığınıñ göñüllileri bu video ikâyelerini çetelde de tarqatıp, çeşit tillerge tercime etmek kerek, dep qarar aldı. Video aqqı olğanlardan izin alıp, çeşit memleketlerniñ göñüllilerinen beraber kerçekleştirgen göñülli teşebbüsimiz oldı. Göñüllilerimiz almanca, fransızca, inglizce ve lehçe tercimelerni seslendirip başladılar. Qırımtatarı Amet-Han Sultannıñ büyük rolü aqqında ikâyeni nam qazanğan oyuncı Ahtem Seitablayev seslendirdi», – dep yazdı Burko.
Qırımtatar halqınıñ erbabı, Sovetler Birliginiñ eki defa qaramanı, uçucı Amet-Han Sultan 1920 senesi oktâbrniñ 25-nde Alupkada doğdı. Babası – lakets (doğma Dağıstandaki Tsovkra-1 avulından), anası – qırımtatarı. Em dağıstanlılar, em qırımtatarlar Amet-Han Sultannı milliy qaramanları dep sayalar. Amet-Han Sultan 603 cenk uçuşını kerçekleştirip, natsist Almaniyanıñ ava quvetlerine ait 30 uçaqnı şahsen ve 19 danesini taqım erkânında urıp tüşürdi. Uçucı 100 çeşit uçquçnıñ qullanuvını ögrendi, onıñ ücümleri 4237 saatnı teşkil etti. Amet-Han Sultan Tu-16 adlı uçqan laboratoriyada sınav uçuşını kerçekleştirgende elâk oldı. Moskvadaki Novodeviçye mezarlığında defin etildi.
2015 senesi mayısnıñ 14-nde Ukraina Yuqarı Radası «Aqmescit» ava limanına Amet-Han Sultan adını berdi. Onıñ adını Mahaçkala (Dağıstan, Rusiye) ava limanı da taşımaqta.
