Qırımtatar asıllı rejissör Ahtem Seitablayev ukrain şairesi Lesâ Ukrayınkanıñ «Orman türküsi» («Lisova pisnâ» – QA) drama-feyeriyası esasında spektakl azırlay. Onı qırımtatar şairi Yunus Qandım tercime etken edi.
Seitablayevniñ malümatına köre, 2003 senesi bu spektal onıñ reberligi altında Aqmescitte sanalaştırılğan edi.
«Ve şimdi bu spektakl yañı unikal formatta qaytacaq. Lesâ Ukrayınkanıñ bu efsaneviy eseriniñ manasını yañıdan baqıp sanalaştıramız. Eki medeniyetniñ belli bir simbiozı olacaq – qırımtatar ve ukrain. Bediiy ifade yolunen mında Qırım işğali sebebinden ayırılğan eki medeniyet birleşe», – dep yazdı o, Facebookta.
Rejissörniñ qayd etkenine köre, spektakl qırımtatarca olacaq, muzıkası qırımtatar ve ukrain muzıkasına esaslanacaq.
Bu leyhanı Seitablayev prodüser Yuliya Sinkeviç ile beraber Ukraina medeniyet fondu desteginen kerçekleştire. Tezden spektaklniñ baş rol kastingini ilân etmege planlaştıralar.
Ahtem Seitablayev «Haytarma», «Başqasınıñ duası», «Kiborğı» ve diger filmlerinde yapqan rejissörlıq işinen bellidir. Soñki vaqıtları qırımtatar asıllı ukrainalı rejissör Oleg Sentsovnıñ «Nomera» levhası üzerinde çalıştı. Ahtem 25-ten çoq film ve serialda oynadı. Yañı soylarından biri – Nariman Aliyevniñ «Evge» filmindeki baş rolü. Bu levha 72-nci Cannes halqara kinofestivaliniñ programmasında ve 10-uncı Odesa halqara kinofestivaliniñ Gran-prisini qazandı.
