Qırımtatar asıllı oyuncı, rejissör Ahtem Seitablayev Rusiyeniñ Qırım işğaline qol tutqan ve Ukraina qanunlarını bozıp, yarımadanı ziyaret etkenler oynağan filmlerniñ Ukrainada kösterilüvine qarşı çıqa.
Bu aqta o, «Qırım haberlerinde Webcast. Parasız işğal» yayınında ayttı.
«1991 senesinden evel çıqarılğan levhalar, Qırım işğaline qol tutqan oyuncılar oynağan levhalar kösterile. Qalğanları – yasaq. Bu milliy telükesizlik meselesidir», – dedi rejissör.
Seitablayev, Rusiyeniñ Qırım işğaline açıq-açıq qol tutqan Fedor Dobronravovnıñ baş rolni oynağan «Svatı» serialınıñ Ukrainada kene kösterilmesi qabul etilmemeli, dep ayttı.
Ahtem Seitablayev «Haytarma», «Başqasınıñ duası», «Kiborğı» ve diger filmlerinde yapqan rejissörlıq işinen bellidir. Soñki vaqıtları qırımtatar asıllı ukrainalı rejissör Oleg Sentsovnıñ «Nomera» levhası üzerinde çalıştı. Ahtem 25-ten çoq film ve serialda oynadı. Yañı soylarından biri – Nariman Aliyevniñ «Evge»filmindeki baş rolü. Bu levha 72-nci Cannes halqara kinofestivaliniñ programmasında ve 10-uncı Odesa halqara kinofestivaliniñ Gran-prisini qazandı.
Qırım işğalinden soñ Ukraina yarımadanıñ bütün halqara keçiş noqtalarını qapattı. Qırımğa qanunğa köre kirmek içün Herson vilâyetiniñ memuriy sıñırındaki keçiş noqtalarını qullanmaq kerek. Bu qaideni bozğan insanlar sürgün etilecek ve para cezasını alacaq.
Ukraina Tış işler nazirligi 2016 senesi iyül ayında muracaat derc etip, çetel vatandaşlarını ve vatandaşlığı olmağan şahıslarnı qanunsız Qırım ziyaretleri aqqında tenbiledi.
Ukraina müessisesi, çetel siyasetçileriniñ Qırım ziyaretleri resmiy olamaz, dep qayd ete.
Çetel artistleri ve diger medeniyet erbapları Rusiye işğal etken Qırımğa Ukraina qapatqan keçiş noqtalarından kirip, Ukraina qanunlarını boza. Qırımğa gastrollerge kelgen ya da Qırımnıñ Rusiye işğaline qoltutqan bazı artist ve yırcılarğa esas Ukrainada çıqışta bulunmağa yasaq ettiler.
Yarımadanıñ Rusiye akimiyeti çetel vatandaşlarını Qırımğa davet etip, ilhaqını qanunlaştırmağa tırışa.
