Ukraina halq deputatı Ahtem Çiygoz Ukraina telükesizlik hızmetinden Rusiye işğal etken Qırımdan esas Ukrainağa ve diger memleketlerge malnıñ «qanunsız ketirilüvi» sebebinden «devlet hainligi» ve «terrorizmni maliye etüv» maddelerine istinaden cinaiy tahqiqat başlatmasını rica ete. Bu aqta Çiygoznıñ Facebookta derc etken beyanatında aytıla.
«Krasnoperekopsk buzdolabı donatmaları zavodı ile emsali olmağan bir adise, UBC Group Ukraina şirketi buzdolap donatmalarını yapıp, «DNR», «LNR» ve AB memleketlerine ihrac ete, dünyaca belli şirketler olarnı satın ala. ABniñ Rusiyege qarşı sanktsiyalarına oğramamaq içün «ukrain» ustaları mal Belgorod vilâyetinde (Rusiye) yapıla, dep sahte vesiqa yapqan edi. Bugün Ukraina telükesizlik hızmetine resmiy şekilde muracaat etecem», – dep bildirdi Çiygoz.
Çiygoznıñ Ukraina telükesizlik hızmetine bergen muracaatında UBC (Ukrainian Beer Company) Group şirketi Ukraina uquqiy şahsı, «UKPOSTAÇ» şahsiy aktsiyalı şirketi ile bağlı olğan şirketler gruppasıdır, dep aytıla.
Çiygoznıñ malümatına köre, UBC buzdolap donatmalarınıñ istisalcısı Qırımnıñ Krasnoperekopsk şeerinde istisalnı saqlay ve anda işlep çıqarılğan malnı bağlı Rusiye şirketleri vastasınen ihrac ete.
«UBC Group reberi Gumennıy İgor Grigoryeviçniñ istilâcı memleket Rusiye Federatsiyasınen pek sıq bağları bar, hususan bu devletniñ resmiy memurları, meselâ, Tataristan Cumhuriyetiniñ prezidentinen bağda buluna», – dep aytıla Çiygoznıñ muracaatında.
UBC Group vekilleriniñ açıq tefsirleri daa yoq. Qırım.Aqiqat olarğa fikrini aytmağa imkân bermege azır. Ukraina telükesizlik hızmeti Çiygoznıñ arizasına şimdilik cevap bermedi.
UBC Group saytında holdingniñ Ukraina, Rusiye, Büyük Britaniya, Beyazrusiye, Kanada, Qazahistan, ABD, Poloniya, Çeh Cumhuriyeti ve Özbekistanda temsilciligi bar, dep haber etile.