Qırımtatar Milliy Meclis reisi, Ukraina millet vekili Ahtem Çiygoz Ukraina Milliy telükesizlik ve mudafaa nazirligini Qırımnıñ Rusiye "yetekçisi" Marat Hunsillinge qarşı sanktsiyalar qoymağa çağırdı. Bunıñ aqqında Çiygoz Facebookta yazdı.
"Muvaqqat işğal etilgen Qırımnıñ Rusiye "yetekçisi" Marat Hunsullinge qarşı sanktsiyalar qoyulması teklifinen deputatlıq arizasını yolladım", - dep yazdı o.
Çiygoz, Ukraina Milliy telükesizlik ve mudafaa nazirliginden Hunsullinge qarşı sanktsiyalar qoymasını ve Ğarp ve halqara teşkilâtlarnıñ Rusiyeniñ Qırımdaki yeteçisine qarşı sıñırlandırıcı tedbirler qullanmasıyeı istegenini qayd etti.
Rusiye akimiyeti Çiygoznıñ teklifine şimdilik daa cevap bermedi.
Yazda Rusiye baş nazir muavini Marat Hunsullin Qırımnıñ «kuratorı» vazifesine kene tayin etildi.
2020 senesi Hunsullin Qırımnıñ kuratorı vazifesine tayin etilgen edi. Ondan evel bu vazifeni sabıq Rusiye baş nazir muavini Dmitriy Kozak eda ete edi.
2020 senesi yanvarnıñ 21-nde Rusiye prezidenti Vladimir Putin Hunsullinni baş nazir muavini vazifesine tayin etti. Bundan evel o, Moskva şeer başınıñ muavini edi.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
