Rusiyede mahküm etilgen Qırımdaki «Hizb ut-Tahrir davasınıñ» mabüsleri Teymur ve Uzeir Abdullayevlerniñ anası Dilâra Abdullayeva iyülniñ 28-nde Ukraina prezidentiniñ ofisi ögünde başlatqan bir kişilik narazılıq aktsiyasını devam etmege niyetlene.
Bu aqta o, çarşenbe künü narazılıq aktsiyası bitken soñ Qırım.Aqiqat mühbirine ayttı.
Qadın oğullarınıñ fotosüretleri olğan yazuvlı şiarlarınen Prezident ofisi ögünde 4 saat turdı.
«Bugün saba 10-nda bir kişilik narazılıq aktsiyasına başlap, saat 2-de bitirdim. Prezident meni qabul eter, dep bekledim, amma kimse çıqmadı. Daa bir qaç kün narazılıqqa çıqmağa planlaştıram. Amma olurmı bilmeyim. Çünki narazılıq aktsiyam aqqında bilgenler ve memurlardan çoq haber keldi, ğaliba», – dep tarif etti Dilâra Abdullayeva.
Qadın Ukraina akimiyeti Ukraina vatandaşları olğan oğullarını azat ettirmek içün ne yapqanını bilmege istey, dep bildirdi.
Rostov-na-Donu Cenübiy okrugınıñ arbiy mahkemesi Aqmescitteki «Hizb ut-Tahrir davası» mabüsleriniñ ükmüni 2019 senesi iyün ayında çıqardı. Daa soñra Rusiye Yuqarı mahkemesi qırımlılarnıñ ükmüni deñiştirdi.
Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñ ükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
Ukraina Tış işler nazirligi bu davağa qarşı narazılıq bildirip, Rusiyege qarşı sanktsiyalarnı quvetleştirmege çağırğan edi.
«Memorial» aq qorçalayıcı merkezi bu davanıñ bütün mabüslerini siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
