Advokat Edem Semedlâyevniñ Qurmanda Rusiye quvetçileri tarafından yaqalanğan Memet Aşurovnen körüşmesine izin bermeyler. Bunı Qırımtatar Milliy Qurultayı Merkeziy saylav komissiyasınıñ reisi Zair Smedlâ bildirdi.
"Bugün saba saat 5-lerde Bağçasaray rayonındaki demiryolda diversiya etkeninde şübeli sayılğan Memet Aşurovnıñ evinde (Qurman qasabası) tintüv olıp keçti. Bugün bu, terrorist ve diversantlarnı köstermek maqsadınen bir sıra tintüvler keçirilecegi daa bir davadır. Biz artıq böyle bir şeynen qarşılatıq. Al-azırda Memetni Aqmesctke FSB idaresine alıp kettiler. Advkoat Edem Semedlâyevniñ onen körüşmesine izin bermeyler", - dedi Smedlâ.
Berilgen malümatqa köre, advokat Edem Semedlâyev bu davada şaat olaraq olıp keçe.
Martnıñ 6-nda Sudaqta Rusiye quvetçileri qırımtatar Edem Murtazayevniñ evinde tintüv keçirgen ediler, bundan soñ o ömür arqadaşı ile beraber yaqalanıp, Aqmescitteki Rusiye Federal telükesizlik hızmetiniñ bölügine ketirilgen edi. Qırımtatar Milliy Meclisi reisi Refat Çubarov Murtazayev işğal etilgen Qırımda Bazarçıq qasabası civarındaki "Aqmescit" stantsiyasına 12 kilometr uzaqlıqtaki demiryolnıñ bir qısmını patlatuv ve zarar ketirüv şübesi ile yaqalanğanını bildirdi.
Daa evel Rusiye FSBsi Bazarçıq (Poçtovoye) köyünde demiryolğa ketirilgen zarar sebebinden Bağçasaray rayonınıñ Priyatnoye Svidaniye köyünde Cemilovlarailesiniñ evini tintken edi.
Fevralniñ 23-nde aqşam Bağçasaray rayonında kimligi belli olmağan insanlar demiryolğa zarar ketirdi. Neticede trenlerniñ areketi toqtatıldı.
Qırımda Rusiye uquq qoruyıcılarınen işbirligi yapqan Rusiye tarafdarı bloger Aleksandr Talipov adiseni «diversiya» dep adlandırdı. Onıñ malümatına köre, «patlav olmadı, qaynaqnen çalışıp, bir qısmını kesip alğanlar». O, «şübheliler belli, operativ tedbirler keçirile», dep ayttı. Rusiye uquq qoruyıcıları adiseniñ sebepleri aqqında bir malümat bermedi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
