Ekinci Bağçasaray "Hizb ut-Tahrir davası" iştirakçileriniñ advokatları, Rostov-na-Donu şeeri Cenübiy okrugınıñ arbiy mahkemesinde oturış olğanda, qabaatlav hulâsalarını tüzetmek içün, davalarnı prokuraturağa qaytarmağa resmiy tarzda rica etti, dep bildire Qırım.Aqiqat mühbiri.
Advokat Aleksey Ladinniñ aytqanına köre, müşteriler nede qabaatlanğanını añlamaq içün, davalarnıprokuraturağa qaytarmaq kerek.
"Müşterimni metinge köre qabaatlaylar: "Cinayette iştirak etkenlerniñ azırlanması, Rusiye Anayasasını bozıp, akimiyetni zornen elge keçirmesi ve tutulmasını maqsat etip, şarait yaratılması, böylece - anayasa qurulışınıñ zorbalıqnen deñiştirmesini közde tutuv". Qabaatlavda alternati cinayet faaliyeti kösterilgen, yani üç areketten ibaret olğan cinayet faaliyeti. İmaye, üç alternativ cinayet faaliyetine qarşı çıqmaq kerek. Neden imaye etmelimiz - zenaatdaşlarıma kibi maña da añlayışlı degil", - dedi mahkemede advokat Aleksey Ladin.
Noyabr 15-inde Rostov-na-Donu şeeri Cenübiy okrugınıñ arbiy mahkemesi, ekinci Bağçasaray "Hizb ut-Tahrir davası"nı baqıp başladı.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
