Qırımlı advokatlar Emine Avamileva ve Emil Kurbedinov Ukraina prezidentiniñ Qırım Muhtar Cumhuriyetindeki daimiy vekili adından fahriy yarlıqlarnen taqdirlendi. Bu aqta ükümetniñ matbuat hızmeti bildire.
Advokatlar «yüksek ihtisaslılıq, vaqtınca işğal etilgen Qırım Muhtar Cumhuriyeti ve Aqyarda siyasiy sebeplerden taqip etilgen insanlarnıñ aqlarını qorçalav boyunca semereli iş içün ve Uquqçı künü munasebetinen» qayd etildi.
«Temsilcilik taqımı içün – bu adiy bir mukâfat degil, bu işğalde qalğan Ukraina vatandaşlarını qorçalamaq içün yapqan büyük işiñiz, siyasiy sebepli taqip telükeleri şaraitlerinde dayanıqlıq ve cesürlik içün minnetdarlıqtır. Bütün Ukraina içün örnek olasıñız», – dep aytıla haberde.
Emil Kurbedinov – qırımlı advokat, aq qorçalayıcı. Rusiye Qırımnı işğal etkeninden berli qırımtatarlarnı faal sürette qorçalay. O, faallerniñ evlerinde keçirilgen tintüvlerni közete. Bundan ğayrı, içtimaiy mediada malümat paylaşıp, halqara konferentsiyalarda iştirak etip ve insan aqları halqara organlarına maruzalar berip, Qırımda insan aqlarınıñ bozuluvına diqqat celp ete.
Emine Avamileva Qırımtatar Milliy Meclisiniñ azası, Qırımtatar Milliy Meclisiniñ prezidium azasıdır. O, qırımtatar tilinde tasil ve qırımtatar tilini Qırımnıñ devlet ve cemaat ayatı saalarına kirsetüv meseleleri bölügini idare ete. Avamileva, siyasiy sebepten açılğan davalarda qırımtatarlarnı qorçalay.
2014 senesiniñ Rusiyeniñ Qırım işğalinden soñ mustaqil jurnalist, vatandaş faali, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
