2018 senesi dekabrniñ 25-nde Rusiye kontrolindeki Qırım Yuqarı mahkemesinde qırımlı cemaat jurnalisti, bloger Nariman Memedeminovnıñ davası boyunca oturışuvı keçirilmedi.
Bu aqta «Qırım birdemligi» cemaat teşebbüsiniñ Facebook saifesinde haber etile.
«2018 senesi dekabrniñ 25-ne Nariman Memedeminovnıñ davası boyunca mahkeme olacaq edi. Faqat oturışuv olmadı. Mahkeme vekili, o, planlaştırılmağan edi, dedi. Advokat Emil Kurbedinov bunı advokatlarğa ciddiy yanaşmaylar, dep izaatladı», – dep qayd etti «Qırım birdemligi».
Şimdilik mahkemeniñ izaatları yoq.
Kreml kontrolindeki Kiyev rayon mahkemesi qırımlı cemaat jurnalisti, bloger Nariman Memedeminovnıñ apis müddetini 2019 senesi fevralniñ 18-ne qadar uzatqan edi.
Martnıñ 22-nde Bağçasaray rayonında Rusiye telükesizlik hadimleri ve uquqqoruyıcıları Nariman Memedeminovnıñ evini tinttiler. Ondan soñ faaliyetçi Aqmescitteki Rusiye FSBsi idaresine alıp ketildi. Martnıñ 23-nde mahkeme Memedeminovnı tevqif etti.
Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatlaylar.
Martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
