Qırımtatar areketiniñ veteranı Veciye Kaşkanıñ ölüminen bağlı mustaqil tahqiqat keçirgen Rusiye advokatı Nikolay Polozov tahqiqat organları tarafından tirenüv kördi.
Bu aqta o, Facebookta yazdı.
«Başta bir qaç ay devamında tahqiqat tahqiqattan evelki teşkerüvniñ malümatınen tanış olmağa bermegen edi, Rusiye Tahqiqat komitetiniñ Kiyev rayon bölüginiñ tahqiqatçısı, adliye mayorı Nadejda Balaşova red qararını çıqardı. Soñra, malümatnı ögrenmege imkân berilgen soñ, mayor Balaşova davanıñ bir qısmını (bu malümat Veciye Kaşkanı tutıp alğan Rusiye gvardiyası ve Ekstremizm ile küreş merkeziniñ hadimlerinen bağlı edi) saqladı», – dep qayd etti Polozov.
Onıñ aytqanına köre, Balaşovanıñ areketleri mahkemede şikâyet etildi, bundan soñ dava malümatlarınen tolusınen tanış olmağa imkân oldı.
«Malümattaki daa bir qaç videosını men baqmadım. Şu cümleden Asan Çapuh, Kazim Ametov ve Bekir Degermenciniñ tutuluv videosı ve Veciye Kaşka cesedini yarıp baquv videosı. Bergen muracaatlarıma Tahqiqat komiteti videolarnı baqmam içün berip olamay, dep cevap bere edi. Ya donatma yoq edi, ya da malümat mahkemede edi. Bir kün mayor Balaşova maña özü telefon etip, onıñ qanunsız areketlerini mahkemege şikâyet etkenim içün açuvlanğanını bildirgen edi», – dep yazdı advokat.
Onıñ qayd etkenine köre, daa soñra malümatnıñ mahkemeden Tahqiqat komitetine qaytmağanı belli oldı, amma neticede advokat onı Rusiye kontrolindeki Aqmescitniñ Kiyev rayon mahkemesinde tapıp, videolarnı baqıp oldı.
«Yeterli qadar malümat alğan soñ (tahqiqattan evel teşkerüv malümatlarından ğayrı, şaatlarnıñ malümatları ve tibbiy vesiqalar bar) Veciye Kaşkanıñ tuvğanlarından razılıq alıp, ölümden soñraki mustaqil vesiqa mahkeme-tibbiy ekspertizasını keçirmek içün mütehassıslarğa muracaat etecek olam. Mahkeme-tahqiqat organlarınıñ tirenüvine baqmadan, Veciye Kaşka ölüminiñ mustaqil tahqiqatı devam etmekte. Eminim, onıñ ölümine alâqası olğanlar erte ya da keç mesüliyetke çekilecek», – dep qayd etti Polozov.
2019 senesi aprelniñ 11-nde Rusiye kontrolindeki Aqmescit rayon mahkemesi advokat Mammet Mambetovnıñ davasını qanaatlendirip, Türkiye vatandaşı Yusuf Aytanğa qırımtatar milliy areketiniñ veteranı Veciye Kaşkadan alğan borcunı ödetmege qarar aldı.
2017 senesi noyabrniñ 23-nde Aqmescitte Rusiye uquq qoruyıcıları Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşı Yusuf Aytandan para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.
Rusiye devlet qabaatlavı «Veciye Kaşka davasınıñ» mabüsleri içün şartlı apis cezaları berilmesini istedi. «Qırım birdemligi» cemaat birleşmesiniñ bildirgenine köre, Rusiye prokuraturası Asan Çapuhnı üç buçuq yılğa, Bekir Degermenci, Kazim Ametov ve Ruslan Trubaçnı üç yılğa üküm etmege talap ete, er birine üç yıl sınav müddeti berile bile.
Aynı vaqıtta, bundan evel Bekir Degermenci, Asan Çapuh, Kazim Ametov ve Ruslan Trubaç qabaatlarını tanımağan edi.
