Qırımdaki Rusiye Tahqiqat komiteti idaresi, tahqiqatçınıñ qararını lâğu etmege ve qırımtatar milliy areketiniñ veteranı Veciye Kaşkanıñ ölüminen bağlı tahqiqattan evel teşkerüvni yañıdan başlatmağa razı olmağan soñ advokat Nikolay Polozov bu red cevabını mahkemede şikâyet etmege mecbur, dep bildirdi.
Advokatnıñ aytqanına köre, o, Rusiye kontrolindeki Aqmescitniñ Kiyev rayon mahkemesine şikâyet arizasını yolladı.
«Müvekkilim – Veciye Kaşkanıñ oğlu İbram ağanıñ fikirince, Kiyev rayonındaki Rusiye Tahqiqat komiteti tahqiqat bölüginiñ tahqiqatçısı keçirgen tahqiqattan evel teşkerüv tolusınen ve doğru yapılmadı. Tahqiqatçı bir sıra fakt ve allarğa qulaq asmadı. Meselâ, acele yardım maşinasında olğan Veciye Kaşkanıñ tahqiqat tedbirlerini keçirgen İç işler nazirliginiñ tahqiqatçısı tarafından tutuluvı», – dep añlattı Polozov Facebookta.
Onıñ fikirince, Veciye Kaşka reanimatsiyağa alıp ketirilse edi, onı qurtarmağa mümkün olur edi.
Polozovnıñ bildirgenine köre, şikâyeti baqılacaq mahkeme fevralniñ 6-na belgilendi.
Yanvarniñ soñunda Nikolay Polozov, Rusiye Tahqiqat komiteti qırımtatar milliy areketiniñ veteranı Veciye Kaşkanıñ ölüminen bağlı dava açmağa razı olmağanınen bağlı şikâyetini qanaatlendirmedi, dep bildirdi.
Polozov, oña FSBniñ «Veciye Kaşka davasınıñ» videosını baqmağa izin berilmegenini bir qaç kere bildirgen edi.
2017 senesi noyabrniñ 23-nde Aqmescitte Rusiye uquq qoruyıcıları Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşı Yusuf Aytandan para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.
Yanvarniñ 27-nde Kreml kontrolindeki Aqmescit Kiyev rayon mahkemesi «Veciye Kaşka davasınıñ» mabüsleri Bekir Degermenci, Kazim Ametov ve Ruslan Trubaçnıñ sıñırlav tedbirini deñiştirip, olarnı ev apsine yolladı.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
