Rusiyede mahküm etilgen ukrainalı rejissör Oleg Sentsovnı martnıñ 1-nde Labıtnangi koloniyasında advokatı Olga Dinze ziyaret etti. Dinzeniñ Qırım.Aqiqatqa bildirgenine köre, «Sentsov özüni bir qarar is ete».
«Saat 12-lerge yaqın niayet Olegge kirip oldım. Özüni bir qarar is etem. Bayağı semirdi, mence. Şimdi yahşı aşay ve sportnen oğraşa, dep ayttı. Özüne ve icadına vaqıt ayıra. Er vaqıt işte, yarım kün sıranen yüreler, yarım kün sport ve icadnen oğraşalar, dedi. Memuriyet tarafından oña nisbeten bir de bir şikâyet yoq. O, da şikâyet etmey», – dedi Dinze.
Onıñ aytqanına köre, al-azırda o, 50-60 kişilik umumiy qışlada buluna.
Oleg Sentsovnıñ advokatı Dmitriy Dinzeniñ bildirgenine köre, açlıq tutqan ukrainalı rejissörniñ yüregi, qara cigeri ve büyrekleri zarar kördi.
Dekabrniñ 7-nde Kyivdeki Dovjenko-merkezinde Rusiyede mahküm etilgen ukrainalı rejissör Oleg Sentsovnıñ pyesası esasında «Nomera» («Raqamlar» – QA) spektakliniñ premyerası olıp keçti. Tedbirni Sentsovnıñ mahküm etilmesi aqqında «Protsess» («Esnas» – QA) filmini çıqarğan rusiyeli rejissör Askold Kurov ziyaret etti.
Sentsov Rusiye apishanelerinde tutulğan ukrainalı siyasiy mabüslerni azat etmek talabı ile 145 künden berli tutqan açlıq narazılığından soñ «aşamağa razı olğanını yazma şekilde bildirdi». Bunı o, «zornen aşatuv telükesi bar olğanından sebep mecburiy adım» dep adlandırdı. Amnesty International zornen aşatuv azap sayıla, dep bildirdi.
Oktâbrniñ 25-nde Sentsov Avropa parlamentiniñ Saharov «Fikir serbestligi» mukâfatına nail oldı. Taqdirlev merasimi dekabrniñ 12-nde Strasburgda ötkerilmeli.
Sentsov ve Aleksandr Kolçenko Rusiye mahsus hizmetleriniñ vekilleri tarafından Qırımda 2014 senesi mayıs ayında, yarımadada terroristik aktlar azırlağanlarında qabaatlanıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıllıq şiddetli rejim koloniyasına qalmağa mahküm etti. Kolçenkoğa 10 yıl koloniya cezası berildi. Ekisi de qabaatlarını tanımay.
