Qırımlı advokat Edem Semedlâyev qırımtatar faali Bekir Degermenciniñ tahqiqat izolâtorında tutulmasını cinayet dep adlandırdı. Bunı advokat Qırım Yuqarı mahkemesiniñ «Veciye Kaşka davasınıñ» mabüsi Bekir Degermencini nezaret altında tutuv müddetini uzatmaq qararını izaatlap bildirdi.
Semedlâyev hatırlattı ki, 2018 senesi yanvar ayından berli Degermenci SİZOnıñ tibbiy bölüginde buluna.
«Keçken sene dekabr ayında reanimatsiyağa tüşti. Bekir Degermenci astma hastasıdır. Onıñ alı SİZOda fenalaştı. Mabüsniñ sağlıq vaziyetine baqmadan, mahkeme imayeniñ iç bir deliline qulaq asmadı. Bekir Degermenciniñ nezaret altında qalma müddeti 2018 senesi dekabrniñ 7-ne qadar uzatıldı. Oña azatlıqtan marum etüv yerlerinde qalmasını yasaq etken 3 şekilli vesiqa ve saqatlıq vesiqası imayege belli olmağan sebeplerden mahkeme içün cezanı deñiştirecek sebep sayılmay», – dedi advokat.
Bekir Degermenciniñ 12 aydan ziyade SİZOda qalması azap olaraq tanılmaqta.
«Veciye Kaşka davasınıñ» mabüsleri Bekir Degermenci, Ruslan Trubaç, Kâzim Ametovnıñ nezaret altında qalma müddetleri dekabrniñ 7-ne qadar uzatıldı. Asan Çapuh ev apsinde qaldırıldı.
2017 senesi noyabrniñ 23-nde Aqmescitte Rusiye telükesizlik hadimleri, Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşından para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
İşbu dava iştirakçileriniñ sağlıq problemleri bar. Degermenci – astma hastasıdır, Çapuh SİZOda mikroinsult keçirdi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
