Qırımda tevfiq etilgen qırımtatar faali Edem Bekirov “Qırım birdemligi” areketiniñ koordinatorlarından birisi Server Mustafayevnen bir SİZO kamerasında otura, dep bildirdi Mustafayevniñ advokatı Sergey Legostovnıñ sözlerinden jurnalist Anton Naumlük.
“Ekisine altı metr, gece-kündüz yarıq yana, toqtamadan videokamera çalışa, eki qatlı töşek, ayaqyol qolaysızlıqları. Kamerada oñaytsızlıqlardan tek qaynatqıç bar. Buzdolap ve televizor yoq, bunıñ içün aşayt mallarını çoq tutıp olamaylar”, - dep aytıp berdi Legostov.
Advokatnıñ aytqanına köre, Bekirov atta yuvunıp olamay, çünki qıbırdamaq onıñ içün qıyın.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi dekabrniñ 13-nde Bekirovnı eki ayğa apiske aldı. O, 2019 senesi fevralniñ 11-ne qadar nezaret altında qalacaq.
Ukraina Tış işler nazirligi mahkemeniñ qararına qarşı «sert narazılıq» bildirdi.
Bekirovnıñ tuvğanları ayatı telükede olğanını bildirgen edi. Malüm ki, apiske alınğan faal şeker hastası ola. Ayağı kesilgen, muntazam sürette sarğılav yapılmalı.
Yanvarniñ 15-nde Bekirov Aqmescitteki Semaşko hastahanesine tibbiy teşkerüv yapılması içün alıp ketirildi. Yanvar 18-inde Edem Bekirovnı, hastahaneden Aqmescit SİZOsınıñ mahsus blokına çıqarğanlarını Lüdmila Denisova bildirdi.
