Rusiye Ceza kodeksiniñ nefret ve duşmanlıq doğuruvı maddesi yımşatılsa da, işğal altındaki Qırımda Rusiye tahqiqatçıları ekstremizm davalarını qapatmay. Bu aqta «Agora» halqara aq qorçalayıcı gruppasınıñ advokatı Aleksey Ladin bildirdi.
Advokat ekstremizmde qabaatlanğan sekiz insannıñ menfaatlarını temsil ete, olarnıñ davaları alâ daa qapatılmadı, dep bildire Radio Svobodanıñ rus bürosı.
Ladin, İsmail Ramazanovnıñ şikâyet arizasını misal olaraq köstere. Qırımdaki Rusiye uquq qoruyıcıları Ramazanovnı Zello online-ratsiyası vastasınen nefret ve duşmanlıq doğurğanında qabaatladı.
Yanvarniñ 8-nde Ramazanov dava qapatılmasını ve onıñ ekstremistler ve terroristler cedvelinden çıqarılmasını rica etken edi. Lâkin Rusiye Tahqiqat komiteti alâ daa bir qarar çıqarmadı.
İsmail Ramazanov 2018 senesi yanvarniñ 23-nde tutulğan edi, Novıy mir köyündeki evinde tintüv keçirilgen edi. Rusiye Tahqiqat komiteti, onı Zello internet-radiosı vastasınen ekstremizm teşviqatında qabaatladı.
İyülniñ 14-nde İsmail Ramazanov SİZOdan çıqtı, çünki bu cinaiy iş boyunca şeklengenler yarım yıldan ziyade nezaret altında qalmay.
Avgustnıñ 2-nde belli oldı ki, Ramazanovğa qarşı cinaiy iş qoşma tahqiqatqa qaytarıldı.
