Rusiyeli advokat Nikolay Polozov Qırım işğalinden soñ yarımadada hırsızlanğan Ervin İbragimovnı temsil etecek. Bu aqta oktâbrniñ 26-nda Polozov Kyivdeki Rusiye elçihanesi ögünde «Cinayet ve ceza» aktsiyası vaqtında ayttı, dep haber ete Qırım.Aqiqat mühbiri.
«Bir müddet evel Ervin İbragimovnıñ babasından bu davanen oğraşmam içün vekâlet aldım», – dedi Polozov.
Polozovnıñ Qırım.Aqiqatqa bildirgenine köre, o, dava malümatlarını ögrenip, davanı alıp baruv strategiyasını belgileycek.
2016 senesi mayısta Bağçasarayda kimligi belli olmağan insanlar Dünya qırımtatar kongressi icra komitetiniñ azası Ervin İbragimovnı qaçırğan edi. Video nezareti kamerası Rusiye yol hızmeti urbasında eki insan İbragimovnıñ maşinasını toqtatıp, onı öz mikroavtobuslarına mindirgenlerini çıqardı.
Qırım aq qorçalayıcı gruppası, Ervin İbragimovnı Rusiye akimiyeti ya da olarnıñ kontrolinde olğan taqımlar hırsızladı, dep tahmin ete.
Rusiye Tahqiqat komitetiniñ Qırım idaresi qaçıruv aqqında cinaiy iş açqan edi. Faqat bugünge qadar Ervinniñ bulunğan yeri aqqında bir malümat yoq.
