Advokat Lilâ Gemeci, oğlu keçken afta eviniñ yanında qaza neticesinde can bergen Aqmescitteki «Hizb ut-Tahrir davasınıñ» mabüsi Ruslan Suleymanovnı SİZOda ziyaret etti. Advokatnıñ malümatına köre, müvekkilinden oğlançıq qıdırılğanda Rusiye uquq qoruyıcıları oña basqı yapqanını bildi.
Bu aqta Gemeci «Qırım birdemligi» birleşmesine haber etti.
Onıñ aytqanına köre, Ruslan Suleymanov cumaertesi künü, iyülniñ 25-nde, oña uquq qoruyıcı organlarınıñ bir çoq hadimi keldi, dep tarif etti.
«Özüni tanıtmadılar, adiy urbada ediler, oña maneviy basqı yapıp, oğlunıñ yerini aytmağa talap etken ediler. Hırsızlav versiyasını baqqanlar, onı Ruslan uquq qoruyıcı organlarına tesir etmek içün teşkil etti dep tüşündiler. Bunıñ kibi usullar iç kimsege qarşı qullanılmamalı», – dep izaatladı Gemeci.
Onıñ qayd etkenine köre, SİZO reberliginden Ruslan Suleymanovnıñ oğlunıñ cenazesine yiberilmesine izin bermesini talap etmege tırıştı.
«Cenaze künü (iyülniñ 27-nde – QA) sabadan berli onı oğlunen vedalaşmağa yibersinler, cenazede olsun dep areket ettim. Yapamağan soñ evine keldim, tuvğanlarına, anası ve apayına haber etmek içün. Oğlançıq endi defin etilgen soñ, SİZOğa kirmege tırıştım. SİZO hadimleri añlayışnen yanaştı, Ruslannıñ balasına ne olğanını bileler ve bu haberni aytmağa imkân bergenler», – dedi Gemeci.
Rusiye quvetçileri advokatnıñ malümatını açıq şekilde izaatlamadılar.
Üç yaşında Musa Suleymanov iyülniñ 24-nde aqşam ğayıp oldı. Qırımnıñ bütün köşelerinden onı qıdırmaq içün bir qaç biñ insan keldi. İyülniñ 26-nda Qırımdaki Rusiye Fevqulâde vaziyetler idaresi bildirdi ki, balanıñ cesedi çuqurda tapıldı. Onı iyülniñ 27-nde defin etkenler.
Bundan evel Qırım ve Aqyardaki Rusiye Tahqiqat komitetiniñ idaresi oğlançıqnıñ coyuluvınen bağlı cinaiy dava açtı, Qırımnıñ Rusiye prokuraturası ise Rusiye Ceza kodeksiniñ 105-inci maddesiniñ 2-nci qısmındaki «v» noqtasına istinaden – küçük balanıñ öldürilüvi – cinaiy dava açtı.
Qırımtatar Milliy Meclisiniñ reisi Refat Çubarov Musa Suleymanovnıñ ölüm sebeplerini bilmek içün yardım etmege azır olğanını bildirdi.
