Kurbedinov FSB binasında tahqiqat tedbirlerinde bulundı, dep tarif etti. Bina çıqışında «E Merkeziniñ» hadimleri advokatnı tutıp, polis bölügine alıp ketti. Soñra oña qarşı Rusiye Federatsiyası Memuriy uquq bozuvları kodeksiniñ 13.15 maddesine istinaden protokol tizip yibergenler – «kütleviy malümat serbestligini suistimal etüv».
«Polis bölüginde maña qarşı memuriy dava açılğanını bildirdiler, içtimaiy ceetten müim olğan malümat aqqında sahte haber tarqatqan ekenim, vatandaşlarnıñ telükesizligi içün havf oldı», – dep tarif etti Kurbedinov.
Advokat bu qabaatlavlarnı «saçma» dep adlandırdı. «Men insan aqları bozuvlarına dair malümatnı derc etken, derc etem ve derc etecem, ve meni advokat olaraq mesüliyetke çekip olamaylar, çünki bu malümat doğru, yoqsa onı derc etmez edim», – dep qayd etti Kurbedinov.
Protokol tizilgen soñ advokat yiberildi. Kurbedinov bu davada memuriy apis cezası olmağanı içün o, umumiy mahkemege berilmesini bekleycek, dep añlattı.
Kurbedinov bu adiseni «Qırımda Rusiye mahsus hızmetleriniñ advokatlarğa qarşı daa bir basqı ıntıluvı» dep adlandırdı. «Maña qarşı ne içün dava açılğanını yahşı bilem», – dep añlattı advokat, tafsilâtlarnı soñra bermege vade etip.
«Gratı» Ukrayına neşiriniñ malümatınakore, yanvarniñ 23-nde E Merkeziniñ polisi E.R.Belâlovadan Kurbedinovnıñ yazğanlarına dair haber aldı ve eki künden soñ teşkerüv teşkil etti. Büyük ihtimalnen, Emine Refatovna Belâlova – «Zafer göñüllileri» («Volonterı pobedı») Kezlev areketiniñ reberi aqqında aytıla.
Kurbedinov – aq qorçalayıcı advokat. O, Rusiye akimiyetiniñ yarımada işğalinden soñ taqip etilgen qırımtatarlarnı qorçalay. Uquqçı Qırımda insan aqlarınıñ bozuluvına da diqqat celp etmege tırışa.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
