Advokat Emil Kurbedinov zapt etilgen Ukraina deñiz askeri, «Nikopol» zırhlı kateriniñ komandanı Bogdan Nebılitsanı Moskva SİZOsında ziyaret etti, dep bildirdi Facebooktaki «Cenk esirleri ukrain deñizcileriniñ imayesi» saifesinde advokat Nikolay Polozov.
«Cenk esirleri ukrain deñizcileriniñ imayesi taqımınıñ advokatı Emil Kurbedinov «Nikopol» kateriniñ komandanı Bogdan Nebılitsanı ziyaret etti. Advokatnıñ aytqanına köre, Nebılitsa özüni yahşı is ete. Tendürist körüne, külümsire. Bunıñnen beraber, «Lefortovo» SİZOsında bulunğan vaqıtta onıñ kamerasını dört kere deñiştirgen ediler. Şimdi Muhammed adlı bir erkeknen otura. Munasebetler yahşı, amma çoq subetleşmeyler», – dep yazdı Polozov.
Advokatnıñ bildirgenine köre, Nebılitsa ile tahqiqat tedbirleri keçirildi, onı ekspertizalar keçirilecek bir qaç qararnen tanıştırdılar. Sorğu da oldı, Nebılitsa cenk esiri olğanını qayd etti.
Dekabrniñ 11-nde Qırımda advokat Emil Kurbedinovnıñ memuriy apis cezası yekünlendi. O, «Hizb ut-Tahrir davasınen» bağlı işke birden başlaycaq, em de zapt etilgen ukrain deñizcisini imaye etecek, dep bildirdi.
Dekabrniñ 7-nde Kreml kontrolindeki Aqmescitniñ Kiyev rayon mahkemesi Kurbedinovnı 5 künge tevqif etti.
Advokatnıñ fikirince, onıñ dekabrniñ 6-nda Rusiye uquq qoruyıcıları tarafından tutulması «olmaycaq sebeplerden» yapıldı, o, ekstremizm qabaatlarını tanımay. Emil Kurbedinov qayd etkenine köre, tutulmasınıñ kerçek sebebi onıñ aq qorçalayıcı faaliyeti, siyasiy mabüslerge köstergen yardımı ve Ukraina askeri Bogdan Nebılitsanı qorçalağanı ola.
Noyabrniñ 28-nde Kreml kontrolindeki Aqmescitniñ Kiyev rayon mahkemesi «Nikopol» küçük zırhlı kateriniñ komandanı, Aqyardaki Nahimov Arbiy deñiz quvetleri Akademiyasınıñ sabıq kursantı Bogdan Nebılitsanı 2019 senesi yanvarniñ 25-ne qadar apiske aldı.
Onı Keriç Boğazında FSB tarafından zapt etilgen 24 ukrain askerinen beraber apiske aldılar. Aqmescitte ve Keriçte Rusiye mahkemesi tarafından apiske alınğan Ukraina deñiz askerleri 6 yılğa qadar azatlıqtan marum qala bile. Qırım Muhtar Cumhuriyetiniñ prokuraturası Rusiye FSBsi zapt etken deñizcilerni cenk esiri olaraq tanıdı.
Noyabrniñ 26-nda Ukraina Yuqarı Radası Keriç boğazında Rusiye arbiyleri tarafından Ukraina gemilerine açılğan ateş sebebinden bir qaç vilâyette cenk vaziyetini ilân etti.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
