Moskva vilâyetiniñ Vlasiha şeer okrugındaki Arbiy istinaf mahkemesi oktâbrniñ 26-nda advokat Lilâ Gemeci ve imayecisi Edem Semedlâyevniñ Cenübiy okrugınıñ arbiy mahkemesiniñ oña qarşı qararına berilgen istinaf şikâyetini baqacaq.
«Qırım birdemligi» bildirgenine köre, mahkeme, Gemeci «mahkeme oturışuvlarınıñ reglamentini çoq bozdı» dep qarar aldı ve 2020 senesi avgustnıñ 17-nde qararını mahkemede seslendirdi.
«Bu şahsiy tarif ile kesen-kes razı degilim. Bir çoq insan bu tarif nasıl çıqarılğanınıñ şaatı oldı. O, qanunsız çıqarıldı, çünki Cenübiy okrugınıñ arbiy mahkemesi evelki mahkeme oturışuvlarına esaslandı. Maña mahkeme oturışuvınıñ protokolını bermeyip, davanı advokatlar palatasına yollağanlar. Cenübiy okrugınıñ arbiy mahkemesiniñ tarifi lâğu etilmeli, dep tüşünemiz. Mahkeme meni eşitir, dep ümüt etem», – dep izaatladı advokat.
Gemeciniñ fikirince, bu şahsiy şikâyet – oña müvekkilini cinaiy davada faal qorçalağan imayecige olaraq yapılğan basqı şeklidir. O, mahkemede qırımlı aq qorçalayıcı ve «Qırım birdemligi» cemaat birleşmesiniñ koordinatorı Server Mustafayevniñ menfaatlarını temsil etti. Mustafayev 2020 senesi sentâbrniñ 16-nda 14 yıl sert rejimli koloniyada qalmasına üküm etildi. Faal Amnesty International tarafından vicdan mabüsi olaraq tanıldı.
«Bu qararnıñ belli bir suvuqlatıcı effekti bar, müvekkilerimniñ imayesinde faal olmamnı eksiltmek ve ileride mahkemege baqıp areket etmem içün. İstinaf şikâyetlerimizniñ mahkeme qararı ne olsa olsun, fikrim deñişmeycek. Müvekkillerimniñ aqlarını, menfaatlarını faal sürette qorçalamağa ve qabaatsız olğanlarını isbatlamağa devam etecem», – dep ayttı Gemeci.
Oña qarşı qararnı bir örnek sayıp, kelecek sefer mahkeme izni olmağanda bir şey aytmağa tırışsa, çetleştirilecegini köstermege tırışalar, dep ayta.
«Başta müvekkilim Server Mustafayev çıqarıldı, ileride meni sustıracaq olalar. Tek maña degil, siyasiy sebeplerden açılğan davalarda iştirak etken advokatlar şahsında bütün aq qorçalayıcı toplulıqqa qarşı bir basqı», – dep ayttı advokat.
Rusiyeniñ Rostov-na-Donu şeerindeki Cenübiy okrugınıñ arbiy mahkemesi sentâbrniñ 16-nda Bağçasaraydaki ekinci «Hizb ut-Tahrir davası» boyunca üküm çıqardı. Marlen Asanov 19 yıl sert rejimli koloniyada, Memet Belâlov 18 yıl sert rejimli koloniyada ve bir buçuq yıl sıñırlav; Timur İbragimov 17 yıl sert rejimli koloniyada ve bir buçuq yıl sıñırlav; Server Zekiryayev 13 yıl sert rejimli koloniyada; Server Mustafayev 14 yıl sert rejimli koloniyada ve bir yıl sıñırlav; Seyran Saliyev 16 yıl sert rejimli koloniyada ve bir yıl sıñırlav; Edem Smailov 13 yıl sert rejimli koloniyada ve bir yıl sıñırlavğa üküm etildi. Ernes Ametov qabaatsız tanılıp, mahkemede azat etildi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
