SİZOnıñ tibbiy bölüginde tutulğan qırımtatar faali Edem Bekirovnıñ insulin dozası arttırıldı. Amma, advokat İslâm Velilâyevniñ aytqanına köre, şeker seviyesi öyle de yüksek qala.
«Künde üç kere insulin ala. Saba ve aqşam uzun seans, üylede qısqa ola. Yaqında keçirilgen teşkerüvden soñ üyle dozası lâğu etildi ve diabetonnıñ bir buçuq apı berile. Edem ağa alğan insulininiñ dozası 30-dan 35-ke artqanını esapladı. Şeker seviyesi ise tüşmey ve yüksek qala», – dep tarif etti advokat Qırım.Aqiqatqa.
Velilâyevniñ qayd etkenine köre, insulin müvekkiliniñ sağlığına zararlı tesir ete.
«Azatlıqta olğanda şeker seviyesini ilâclarnen tertip etken edi. SİZOda er şey protokolğa köre, şingen insulin berilse, ine qoyacaqlar. Amma insulin onıñ içün pek zararlı ola, hususan dört suniy damarı olğan yüregine. İnsulin onıñ yüregini yavaş-yavaş öldüre», – dep añlattı advokat.
Aprelniñ 8-ne belgilengen mahkeme oturışuvında apis cezasınıñ uzatılması baqılacaq, imaye Bekirovnı ev apsine avuştırmağa rica etecek.
«Sıñırlav tedbiri deñiştirilmeli, hastahanede baqtırmaq, tamçılıq koymaq içün ev apsinde bulunmalı. SİZOda insulinden ğayrı bir şey berilmey, qalğanlarını tuvğanları ketire. Kelecek oturışuvda sıñırlav tedbirini deñiştirmege kene rica etecekmiz», – dedi advokat.
Keçenleri Ukraina Yuqarı Radasınıñ insan aqları vekâletlisi Lüdmila Denisova Rusiye zenaatdaşı Tatyana Moskalkovağa qırımtatar faali Edem Bekirovnıñ sağlıq vaziyeti aqqında muracaat yolladı.
O, tibbiy teşkerüvden soñ insulin iñektsiyalarından allergiya keçirdi.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
