Aqmescitte Rusiye Ekstremizm ile küreş merkeziniñ hadimleri FSB binası ögünde advokat Emil Kurbedinovnı tuttı, dep haber ete «Qırım birdemligi».
Uquqçı Emine Zekeryayevanıñ davasında tahqiqat tedbirlerinde iştirak etken İç işler nazirligi tahqiqat idaresiniñ binasından çıqqanda tutuldı.
«Aqmescitte FSB İdaresiniñ binası ögünde advokat Emil Kurbedinov tutuldı. Ekstremizm ile küreş merkeziniñ hadimleri onı şeer polis bölügine alıp kete», – dep aytıla haberde.
«Emil telefon etti, tahqiqat tedbirlerinden çıqa edi. Onı Ekstremizm ile küreş merkeziniñ hadimleri Roman Filatov ve Ruslan Şambazov qarşılap, olarnen beraber kelmesini istediler», – dep ayta Kurbedinovnıñ ömür arqadaşı Diana.
«KrımSOS» qayd etkenine köre, Filatov ve Şambazov advokat ve aq qorçalayıcılarğa qarşı diger memuriy davalarda iştirak etken ediler. Hususan – eki yıl evelsi advokat Edem Semedlâyev tutulğanda.
Soñra Kurbedinovnı yiberip, «Kütleviy malümat serbestligini suistimal etüv» maddesine istinaden protokol tizgenler. Laf Telegram kanalında advokatnıñ «KEMska volost» yazğanları aqqında kete. O haberde askerligi soñrağa qaldırılması mümkün olğan studentlerge celpname kelgen olsa, Rusiye Federatsiyası saflarına nasıl oğramamaq mümkün olğanı tarif etile.
«Oquğanlar, askerlikke alınması soñrağa qaldırılğanlar, arbiy komissarlıqqa komissiyağa celpname yollay, soñra gençler diplomlarını bile alamaylar – orduğa alınalar», – dep aytıla iyülde çıqqan haberde.
«Gratı» Ukrayına neşiriniñ malümatınakore, yanvarniñ 23-nde E Merkeziniñ polisi E.R.Belâlovadan Kurbedinovnıñ yazğanlarına dair haber aldı ve eki künden soñ teşkerüv teşkil etti. Büyük ihtimalnen, Emine Refatovna Belâlova – «Zafer göñüllileri» («Volonterı pobedı») Kezlev areketiniñ reberi aqqında aytıla.
Kurbedinov – aq qorçalayıcı advokat. O, Rusiye akimiyetiniñ yarımada işğalinden soñ taqip etilgen qırımtatarlarnı qorçalay. Uquqçı Qırımda insan aqlarınıñ bozuluvına da diqqat celp etmege tırışa.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
