Rusiye kontrolindeki Aqmescitniñ Merkeziy rayon mahkemesi Rusiye Memuriy bozuv kodeksiniñ 19.3 maddesine istinaden polis hadimine boysunmama aqqında tizilgen ekinci protokolnı yekünlenmesi içün yollap, qırımlı advokat Edem Semedlâyevni Sudaq vaqtınca tutuv izolâtorından azat etti.
Bu aqta imayeci Ayder Azamatov «Qırım birdemligi» cemaat birleşmesine haber etti.
Birleşke qayd etkenine köre, Rusiye polisiniñ hadimleri Edem Semedlâyevniñ davası boyunca protokolnı advokat №3 «Merkeziy» polis bölüginde «E» merkeziniñ hadimi Ruslan Şambazovnıñ talabınen ses qaydını toqtatmağa soñ tizdi.
İmayeci Ayder Azamatov Merkeziy rayon mahkemesinde Rusiye Memuriy uquq bozuvları kodeksiniñ 24.3 maddesine («Memuriy uquq bozuvları davalarınıñ açıq baqıluvı») esaslandı. Uquqiy normağa köre, memuriy uquq bozuvları davası boyunca esnasta iştirak etken şahıslarnıñ ses qaydı vastasınen dava ketişatını qayd etmege aqları bar.
«O, mahkemeden, tahqiqatçıdan, polis hadiminden izin almamalı. Ağzaviy şekilde video çıqarğanını bildirmek yeterli ola. Edem Semedlâyevniñ areketleri tamamen qanuniy ola, amma polis hadimleriniñ areketleri qanunsız olmaqnen beraber advokatnıñ itibarını, şerefini ve iş reputatsiyasını aşalay, çünki advokattan urbasını çıqarmasını talap etip baqmaq qanunnı sert bir şekilde boza», – dep añlattı Azamatov.
Mahkeme, imaye tarafını tutıp, polis hadiminiñ qaba hatalarını qayd etti: Semedlâyevge aqları añlatılmadı, protokol kopiyası berilmedi.
«Protokol tizüv keyfiyeti ve şahıslarnı memuriy mesüliyetke çeküv nizamına eki dep qıymet kesem. İş vazifelerine munasebetleri deñişmeli. Bir fakt olmağanda memuriy protokol tizmege olmay», – dep qoştı Azamatov.
Böylece, Edem Semedlâyev Sudaqnıñ vaqtınca tutuv izolâtorında bir kün yattı, şimdi azatlıqta buluna. Ayder Azamatov advokatlar toplulığı bu vaziyetke menfiy qıymet kese, dep bildirdi.
ABD, Rusiyeni qırımlı advokat Semedlâyevni acele azat etmesine çağırdı.
Bundan evel qırımlı advokat Edem Semedlâyev oktâbrniñ 25-nde Aqmescitte o künü mahkeme binası ögünde tutulğan qırımtatar faallerini imaye etmek içün kelgen polis bölügi ögünde tutulğan soñ Rusiye quvetçileriniñ areketlerinen bağlı şikâyetini Qırımnıñ Advokat palatasına berdi, dep bildirdi.
Cumaertesi künü, oktâbrniñ 25-nde, Aqmescitteki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» mabüslerine qoltutmaq içün toplaşqan 20-den çoq kişini tuttı. Tutulğanlarnı Aqmescitniñ Merkeziy rayon polis bölügine alıp kettiler.
Daa soñra Rusiyeniñ Merkeziy rayon bölügine kelip, saba mahkeme ögünde tutulğan qırımtatarlarğa uquqiy yardım köstermek içün kelgen advokat Edem Semedlâyevge qarşı «poliske boysunmağanı» içün memuriy protokol tizildi.
Aqmescitte Rusiye kontrolindeki Qırım garnizor arbiy mahkemesiniñ binası ögünde tutulğan qırımtatar faalleri, jurnalistler ve advokat yarımada regionlarınıñ farqlı vaqtınca tutuv izolâtorlarına ketirildi. Oktâbrniñ 26-nda mahkeme keçirilmesi planlaştırıla.
Qırımnıñ Rusiye quvet müessiseleri bu tutuvlarnı tefsir etmey.
«Krım SOS» cemaat teşkilâtı Aqmescitte qırımtatar faalleri tutulğanı sebebinden «Qırım platformasınıñ» işini faalleştirmege çağırdı.
Rusiye quvetçileriniñ oktâbrniñ 25-nde qırımtatar faallerine qarşı yapqan areketlerini takbih etken beyanat Ukraina prezidentiniñ Qırım Muhtar Cumhuriyetindeki Temsilciligi tarafından aydınlatıldı.
