Aqmescitteki «Hizb ut-Tahrir davasınıñ» mabüsi Teymur Abdullayevniñ sağlıq vaziyeti fenalaştı. Bu aqta advokatı Marina Dubrovina Qırım.Aqiqat mühbirine bildirdi.
«O, başta suvuqlandı, otit oldı, SİZOda onı baqmadılar. Teymur izolâtor memuriyetinden bir qaç kere tibbiy yardım istegen edi, amma yardım kösterilmedi. Şimdi yüz siñiri yanğısı başlandı», – dep ayttı Dubrovina.
Onıñ bildirgenine köre, Abdullayevniñ betiniñ sağ tarafı üyüşti, sağ qulağı eşitmey ve pek ağıra.
Advokat Lilâ Gemeciniñ malümatına köre, Abdullayevni izolâtorda baqmaq içün feldşer kelgen edi, uzaqtan baqıp, «antibiotik almağa» teklif etti. Abdullayev razı olmadı, çünki kerekli teşkerüv yapılmadı ve diagnoz qoyulmadı.
«Mahkemede muracaatta bulundıq. Kelecek mahkeme oturışuvında mahkeme salonına acele tibbiy yardım çağıracaqmız. Teymurnıñ bir qulağı eşitmese, onıñ mahkemedeki iştiraki nominal ola. İnsan oturıp, acı is ete. Vaziyet ciddiy, aqibetleri fena ola bile», – dep qoştı Dubrovina.
Mahkeme imaye delillerini qabul etip, SİZO reberliginden tibbiy teşkerüv ve tedaviylev isteycek, dep vade etti.
Advokatınıñ bildirgenine köre, izolâtor yolbaşçısına ve nezaret prokurorına şikâyet yollanacaq.
Aprelniñ 10-nda dava mabüsiniñ anası Dilâra Abdullayeva Rostov-na-Donudaki №1 SİZOsınıñ yolbaşçısına şahsen barmağa planlaştıra.
Keçken sene dekabrniñ 6-nda belli oldı ki, «Hizb ut-Tahrir davasınıñ» Aqmescit taqımınıñ mabüsleri Teymur ve Üzeir Abdullayevler, Ayder Saledinov, Rustem İsmailov ve Emil Cemadenovnı Rostov-na-Donu Rusiye şeeriniñ SİZOsına etap ettiler.
2016 senesi oktâbrniñ 12-sinde Qırımda beş musulman qorantasınıñ evleri tintildi. Tintüvler neticesinde Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzeir Abdullayev, Teymur Abdullayev, Emil Cemadenov ve Ayder Saledinov tevqif etilgen edi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
