Advokat Lilâ Gemeciniñ bildirgenine köre, Aqmescit SİZOsında 10 künden berli Qurmandaki «Hizb ut-Tahrir davasınıñ» mabüsi Eskender Abdulganiyevge tibbiy yardım kösterilmey. O, SİZO reberliginden buña qulaq asmasını talap ete. «Qırım birdemligi» cemaat birleşmesiniñ haber etkenine köre, advokat bunı işkence dep adlandırdı.
«10 künden berli onı (Abdulganiyevni) tiş ağrısı raatsızlay, SİZO şaraitlerinde yapqan teş işleri – tişni çıqarğanlar. Abdulganiyev ağrığa dayanmağa mecbur edi, sıcağı bar edi. Bu şaraitlerni işkence dep sayam, bu Rusiye ceza-protsessual kodeksine ve halqara normalarğa zıt kele. SİZO reberligi buña qulaq asmalı», – dedi advokat.
Daa evel haber etilgeni kibi, Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davasınıñ» imaye tarafı bergen eki muracaatnı red etti.
2019 senesi dekabr ayında Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davası» mabüslerini 2020 senesi iyünniñ 13-ne qadar apiste qaldırdı.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Fevralniñ 15-nde Kreml kontrolindeki Kiyey rayon mahkemesi olarnı tevqif etti.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
