Ukraina Adliye naziriniñ muavini, Avropa insan aqları mahkemesiniñ meselelerinden vekâletli İvan Lişçina, Rusiye tarafından işğal etilgen Qırımda ve Donbasnıñ vaqtında işğal etilgen topraqalrında olğan vaqialar sebebinden ukrainlerniñ Avropa insan aqları mahkemesine tahminen 7000 ariza bergenlerini aytıp berdi.
“Mahkeme Qırım ve Donbas ile bağlı 7000-ge yaqın ariza bar olğanını ayttı, biz ise şimdilik tek 200-ge yaqı material aldıq, olarnıñ episi Donbas ile bağlı… Mahkeme, davacılarnıñ vatandaşı olğan devlet avtomatik olaraq davada üçünci taraf kibi iştirak etmege aqqı olğanına köre bu arizalarnı bizge yollamaq kerek”, – dep aytı Lişçina "Tsenzor.NET" ukrain neşrine intervyü bergende.
Yanvarnıñ 14-nde Avropa insan aqları mahkemesi Qırım ile bağlı Ukrainanıñ Rusiyege qarşı davası boyunca Büyük palatanıñ qararını ilân etti. Oña köre, mahkeme davanı “qısmen maqbul” tanıdı ve onıñ aslını baqıp başladı.
Ukraina Tış işler naziri Dmıtro Kuleba Büyük palatanıñ Qırım ile bağlı qararını “Ukrainanıñ ğalebesi”, dep adlandırdı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
