Rusiyeniñ Rostov-na-Donudaki mahkemesi "Qırım musulmanları davası"nıñ beş faaline üküm çıqardı. Qırımtatar faali Enver Ametovnı mahkeme 13 yıl sert apis cezasına mahküm etti. Qırım.Aqiqat onıñ mahkemedeki soñki sözüni yayınlay.
Men Ametov Enver Esfindiyeroviç. Musulmanım, siyasiy mabüsim. Bir çoq musulman qardaşım kibi mahkme etilem. Men 1975 senesi avgustngıñ 2-nde Özbekistannıñ Ferğana şeerinde doğdım. Sovet Birliginiñ devrinde Rusiye Federatsiyasınıñ ordusında hızmet ettim.
Arbiy hızmetten soñ ecdatlarımnıñ toprağı Qırım Cumhuriyetine daimiy yaşayış yerine qayttım. Yaşamaq ve inkişaf etmek, aile qurmaq, evlâtlarıma tasil bermek, doğru yaşayış tarzını sürmek, İslâm dinini kütmek ve onıñ medeniyetini ögrenmek, cemaat ve halqıma faydalaı olmaq içün. Ögüme qoyğan maqsatlarıma iriştim. Yani men evlendim, aile qurdım, balalarım doğdı (üç balam bar). Bütün bu vaqıt devamında ailemniñ cemiyette em iqtisadiy, em de içtimaiy ceetten lâyıq yer alması içün ğayret ettim.
Öz tecribemden bilem ki, bugün büyük bir aileni keçindirmek. qolay degil, buña bütün vaqıt kete demek mümkün. Sade sözlernen aytqanda, kiyindirmek, aşatmaq ve daa çoq başqa şey yapmaq kerek. Bundan ğayrı balalarnıñ içtimaiy müitke integratsiyası içün olarnı bağçağa, mektepke alıp bara edim, balalar öz yaşdaşlarından ayırılmasınlar dep er şey yapa edim. Balalarıma ahlâqiy terbiye bermege tırışa edim. Dinimizniñ bizge ögretkenini ögretmege tırışa edim. Olarnı merametli, insaflı olmağa, büyüklerge ürmet köstermege, başqa millet vekillerine ve başqa dinni kütkenlerge tolerant olmaqnı ögretmege tırışa edim. Bu menim yaşayışqa baqışım, men şimdi de böyledirim.
Amma 2019 senesiniñ vaqiaları bir ande bütün yaşayışımıznı deñiştirdi. Halqına, ailesine ve cemiyetke faydalı olmağa tırışqanlarnıñ, yaman şey yapmağanlarnıñ, doğru yaşağanlarnıñ yaşayışı deñişti.
İslâm dinini kütkenlerni terrorcılıq, ekstremizm, akimiyetni zorlav yolu ile elge keçirüv, ağır cinayetler ile qabaatladılar. Cinayet taqibi başlanğandan berli iç bir uydurma dava boyunca qabaatımnı tanımadım ve tanımayım ve taqip etilmemni siyasiy motivli dep sayam. Meslek ve aqiqatnı aytmaq, adaletni mudafaa etmek tırışqanıñ ve yüz bergen qanunsızlaqlarğa razı olmağanını bildirgeniñ içün.
Men musulmanım, İslâm dinini kütem. Bizim dinimiz zorbalıq ve terrornı yasaq ete. İslâm ve terrorcılıq arasında ortaq bir şey yoq. İslâm bizge doğru yaşamaqnı, qarını beyazdan farq etmekni, yaman çizgilerni yoq etmekni, eyi olmaqnı ögrete, bizni doğru yolnen alıp kete. İslâm dini olmasa edi, kim olur edim, bilmem. Makemelengenler skemlesinde bulunıp, bütün bu mahkeme esnaslarını közetip, bu mahkemelerde teskin tapmadım. Qabaatlayıcınıñ ve mahkemeniñ qararını diñlep kederlendim. Aqlarımız bozulğanına, davada bir çoq bozuvlar olğanına baqmadan, olar bizni suçsuz, İslâm dinini kütken insanlarnı qabaatlaylar.
Adaletke ne oldı?! İslâm dini bizge köstergeni kibi yaşamaqnı tüşünsem ve fikrimni ses çıqarıp bildirsem, bunı gizlemesem devletniñ duşmanı olacağım. Yoq, men özümni duşman saymayım, men qanunsız bir şey yapmadım. Bugün ise devlet meni duşman dep saya.
1993 senesinden başlap 2014 senesinece, yani 21 yıl Ukrayinanıñ terkibinde olğan Qırımda yaşayım. Bütün bu vaqıt devamında cumhuriyetniñ territoriyasında bir kere bile terror eylemi olmadı, akimiyetni elge keçirmek içün de bir kere biri ıntıluv olmadı. Şunı da aytmaq isteyim ki, 2014 senesinden soñ bile olmadı.
Qırımtatar halqı özüni işkir, diger halqlar ile tınç yaşağan, zorbalıqnı red etken , keçmişte aqlarını yalıñız qanuniy usullarnen tiklemege tirişqan halq kibi kösterdi. 29 yıl içinde Qırımda qırımtatarlar adamlarnı esir etip ya da devlet müessiselerni zapt etip nasıldır siyasiy talaplar köstergenini asla eşitmedim. Yani, öz maqsatlarına irişmek içün bizim halqımız terroristik usullarnı iç qullanmadı.
Bu kibi cinayetlerde suçlama menim ve semetdeşlerimini halqımıznıñ ögünde yamanlamaq, dünya toplulığı ögbnde halqmıznıñ itibarını tüşürmek içün yapılğanını tüşünem. Qabaatlav tarafınıñ bizim qabaatlı olğanımznı tasdıqlağan bir bile delili yoq.
Aksine, olarnı yapqanlarını bizge ve ailelerimizge qarşı terroristik eylemler kibi saymaq mümkün: saba adamlarğa yuqlağanda evlerine basıp kirüvler, tintüvler, közlerini bağlap belli olmağan yerlerge alıp ketüvler.
İlk nevbette mahkeme bizim aqlarımız bozulğanına baqmaq kerek edi. Çünki bizim ailelerimiz ve tuvğanlarımız da zarar kördi. Davamız kerçekten baqılğan kibi olsa edi, bizim laf etkenimizde iç bir suç olmağanını añlar edi. Yani er bir insan bunı yapa ve bu normal bir şeydir. Fikir serbestligi cinayet degildir. Er bir insannıñ öz fikrine aqqı bar.
Bu üküm menim aqlarımı boza. Onıñ lâğu etilmesini ve menim ve bu dava boyunca qabaatlanğan diger mabüslerniñ deral azat etilmesini talap etem.
Ve soñunda sevimli apayıma, yaqınlarıma, tanışlarıma ve tuvğanlarıma teşekkür etmek isteyim. Advokatlarımız ve cemaatımızğa da minnetdarım. Allah sizden razı olsun!
Enver Ametov, qırımtatar faali
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.