Ukraina prezidenti Volodımır Zelenskıy gece Mıkolayıv vilâyetinde bir yıl evelsi işğal etilgen Qırım yaqınlarında Rusiye FSBsi tarafından zapt etilgen ukrain arbiy katerleri ve buksirni qarşıladı.
«Berdânsk», «Nikopol» zırhlı katerleri ve «Yañı Qapu» buksiri endi Mıkolayıv vilâyetinde bulunalar. Adım-adım barışıqqa ketemiz, Ukraina kene birlik olsun dep, diplomatik çezüvler qıdıramız», – dep aytıla Zelenskıynıñ Facebook saifesinde.
Prezident, gemiler kelgen Oçakivge bir qaç saat keç qalıp keldi. Onıñ uçağı Çuğuyıvdaki arbiy uçaq alanından vaqtında çıqamadı, çünki köçüricisi bozuldı. Zelenskıynıñ yanında Almaniya elçisi Anka Feldguzen, Frenkistan elçisi Etyen de Ponsen ve Minskteki Üç taraflı bağ gruppasınıñ OSCE mahsus vekili Martin Saydik bar ediler.
«Ğaydamaka», «Sapfir» ve «Titan» ukrain buksirleri FSB zapt etken arbiy gemilerni Qırımdan alıp, noyabrniñ 20-nde aqşam esas Ukrainağa qaytardı.
Ukraina Silâlı quvetleri Arbiy-deñiz quvetleriniñ komandanı İgor Voronçenko qaytqan gemilerniñ vaziyetine tahqiqat areketlerinden soñ qıymet kesecekler, dep bildirdi. Onıñ aytqanına köre, zapt etilgen gemilerde bazı bağ vastaları ve navigatsiya donatmaları bozulğanına dair malümat bar.
Bazarertesi künü, noyabrniñ 18-nde, bir yıl evelsi Qara deñizde Keriç boğazı yanında zapt etilgen «Nikopol», «Berdânsk» ukrain katerleri ve «Yañı Qapu» buksiriniñ Rusiye tarafından qaytarıluv esnası kerçekleştirildi, dep bildirdi Ukraina Arbiy-deñiz quvetleriniñ komandanlığı.
Halqara deñiz uquqı mahkemesi Rusiye zapt etken Ukraina gemileriniñ davası boyunca mayısnıñ 25-nde olğan Gamburgdaki oturışuvda Rusiyeni arbiy gemilerni acele azat etip, Ukraina kontroline qaytarmasına mecbur etti.
2018 senesi noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, berilgen malümatqa köre, üç Ukraina arbiy gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Ukraina deñizcileriniñ 6 yılğa qadar azatlıqtan marum qalması mümkün edi.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
