Abu-Dabide keçirilmesi planlaştırılğan Ukrayina, ABD ve Rusiye üç taraflı körüşüvinen bağlı yañı malümat şimdilik yoq, dep ayttı Ukrayina prezidenti Volodımır Zelenskıy martnıñ 2-nde medianıñ suallerine cevap berip.
Onıñ aytqanına köre, körüşüv Birleşken Arap Emirlikleriniñ paytahtı Abu-Dabide martnıñ 5-i ile 8-i arasında olacaq edi, tahminen martnıñ 5-6-nda.
"Bugünki uruş areketleri sebebinden Abu-Dabini tasdıqlap olamaymız, amma körüşüvni kimse lâğu etmedi. Körüşüv olmalı, bizim içün müim, bu körüşüvge qoltutamız. Körüşüv müim, neticeler müim, deñişüv müim", – dep qayd etti Zelenskıy.
Ava ücümleri sebebinden Abu-Dabide körüşüvniñ teşkil etilüvinen bağlı qıyınlıqlar olsa, körüşüv başqa yerde ötkerile bile, dep qoştı o:
"Mence, Türkiye, İsviçre bar, endi çalışqan ve bizge körüşmege imkân bergen meydançıqlar. Bu körüşüv içün üç meydançıqtan birine qoltutacaqmız, ortaqlarımızdan cevap bekleymiz".
Fevralniñ 26-nda prezident Volodımır Zelenskıy Ukrayina, ABD ve Rusiye üç taraflı körüşüvi martnıñ başında Abu-Dabide (BAE) olacaq, dep tahmin etken edi. Fevralniñ 28-nde İsrail ve ABD İranğa ücüm etken soñ ve İran Yaqın Şarqta darbe endirgen soñ Zelenskıy Ukrayina, ABD ve Rusiye üç taraflı körüşüviniñ vaqtı ve yeri "telükesizlik şaraitleri ve kerçek diplomatik imkânlarına köre" belgilenecek, dep qayd etti.
Yanvar ve fevral ayları devamında Ukrayina, ABD ve Rusiyeniñ cenkni bitirüv üç taraflı körüşüvleriniñ bir qaç raundı ötkerildi. Belli bir neticeleri haber etilmedi. Amma fevralniñ 5-nde taraflar esir deñişüvi aqqında añlaştı – soñki beş ayda ilk.
Fevralniñ 28-nde saba İsrail arbiyleri İranğa darbe endirdi. İsrail "preventiv darbe" dep adlandırğan areketlerini ilân etken soñ ABD prezidenti Donald Trump Washington İranğa qarşı "büyük uruş operatsiyalarını" başlattı, dep bildirdi.
İrannıñ İslâm inqilâbı qaravul korpusı ABD ve İsrailniñ darbelerine İsrailge qarşı bir qaç uçucısız dalğası ve ballistik raketalarnen cevap berdi. İran da ABD silâlı quvetleriniñ bazaları yerleşken Yaqın Şarqnıñ bir qaç memleketine raketalar attı. Bahreyn, BAE, Qatar ve Saudiy Arabistanda patlavlar aqqında haber etildi.