Yanvarniñ 9-ında Abhazistanda yañı saylavlarnı talap etken kütleviy narazılıqlar başlandı. Bir qaç yüz miting iştirakçileri Suhuminiñ merkezinde toplandı, Abhazistan prezidenti memuriyeti binasınıñ qapısını bozıp açtı ve müessiseni ücüm etti, haber ete "Nasoyaşçeye vremâ".
Abhazistan İçki işler naziriniñ birinci muavini Beslan Bagateliya, küç organları narazılıq iştirakçilerini binadan çıqarıp olğanını TASS agentligine haber etti.
"Binağa sürip kirgenlerni quvıp çıqardılar", - dedi o.
Amma biraz keççe narazılıqnı köstergen adamlar kene ücümni başlap, birinci qattaki pencerelerden bina içine kirmege tırıştı. Bir qaç adam kirip oldı, amma qaravullar olarnı tuttı.
Abhazistan Mudafaa naziri Mirab Kişmariya, şimdilik küç organları buña qoşulmağanını "İnterfaks"qa haber etti.
"Abhazistan ordusı öz halqına qarşı çıqmaz", - dedi Kişmariya.
Abhazistan, Gürcistannıñ separatist bölgesi, 1993 senesinde Gürcistan ile cenkten soñ mustaqillikni ilân etti. Rusiye Abhazistandaki separatist keylerge daima qol tuta edi, 2008 senesinde ise beş künlik Gürcistan-Rusiye cenkinden soñ, Abhazistannıñ mustaqilligini tanıdı. Gürcistan, Abhazistan ve Cenübiy Osetiyanıñ topraqlarını Rusiye tarafından işğal etilgen, dep saya ve Rusiyeni topraq bütünliginiñ bozmasında qabaatlay.
