Rusiye uquq qoruyıcıları qırımlı aq qorçalayıcı Abdureşit Cepparovğa Qırımtatar sürgünliginiñ qurbanlarını añma künü ögünde "qanun bozulmaycağına dair" tenbi ketirdi. Bu aqta Cepparov "Qırım birdemligi" cemaat birleşmesine bildirdi.
Onıñ aytqanına köre, Rusiye polisiniñ üç hadimi oña aprelniñ 29-nda keldi. Olar vesiqanı Cepparov daa evel memuriy mesüliyetke çekilgeni içün oña ketirdi, dep añlattı. Polis hadimleri tenbini mayısnıñ 1-nde ve 9-nda devlet bayramlarınen bağladı.
Vesiqada qayd etilgenine köre, Abdureşit Cepparov "Ekstremist faaliyetine qarşı" ve "Toplaşuv, miting, yürüş ve piket" Federal qanunlarını bozuv sebebinden tenbilengen edi. Kütleviy aktsiyalar keçirilse, memuriy ve cinaiy maddelerge istinaden ceza berile bile, dep aytıldı.
"Olar özleri uydurğan telükeden özüni qorumağa isteyler. Qayd etken künlerine bizim ne alâqamız bar? Bu tedbirler keçse, yahşı ya da yaramay, bizge ne? Ne maqsadnen bizge keleler?", – dep añlamağanını bildirdi Abdureşit Cepparov.
Er yıl mayısnıñ 18-i arfesinde polis hadimleri qırımtatar cemaatçıları, faal ve aq qorçalayıcılarnı tenbiley. Bu yıl Rusiye polis hadimleri qırımtatar faali Müslim Zevriyevge tenbi bermege tırıştı. Onı videokamera ögünde vesiqanı almağa red etkenini aytmağa mecbur etip yiberdiler.
2024 senesi kütleviy aktsiyalar vaqtında jurnalist Lutfiye Zudiyeva, uquqçılar Lilâ Gemeci, Rustem Kâmilev, Sudaqlı cemaat imayecisi Seytosman Karaliyevge "qanun bozulmaycağına" dair tenbiler berilgen edi. Karaliyevniñ vesiqasında "kütleviy aktsiyanıñ teşkilâtçısı ola" ve ekstremist faaliyetine ve cemaat nizamınıñ bozulmasına "yol bermemek içün tedbir almalı", dep qayd etildi.
O sene uquqçı Nazim Şeyhmambetovğa da tenbi vesiqası berildi. Onı "cinayet ve uquq bozuvları içün şarait yaratqan areketler olmaycaq, ve cemaatqa qarşı areketler yapılmaycaq" dep tenbilep, Rusiye Federatsiyası Silâlı quvetlerini itibardan tüşürüv areketler maddesinen qorquzdılar.