Rusiye kontrolindeki Qırımnıñ Qarasuvbazar rayon mahkemesi tutulğan qırımtatar aq qorçalayıcısı Abdureşit Cepparovnı «poliske riayet etmegeni» içün 12 künge apiske aldı, dep haber ete «Qırım birdemligi».
Cepparov Rusiyeniñ memuriy uquq bozuvları kodeksiniñ 19.3 maddesine istinaden (iç işler organları hadiminiñ talapları ya da emirlerine riayet etmeme) apiske alındı.
Apis qararı aqqında Aqmescitniñ rayon polis bölüginiñ izolâtorında Cepparovnı advokat Edem Semedlâyev ziyaret etken soñ belli oldı.
Qarasuvbazar rayon mahkemesi tünevin Cepparov tintüvden soñ alıp ketirilgende qarar çıqardı. Bütün kün onı soy-sopları ve advokatlar tapmağa tırıştı. Cepparov Aqmescitteki FSB bölüginde edi, soñra da poliste, anda oña qarşı memuriy protokol tizildi, bilgisayarınıñ alınmasına tirengen dediler. Cepparov mahkemede bunı inkâr etti.
Cepparovnıñ imayesi memuriy apis cezasını Rusiye kontrolindeki Qırım Yuqarı mahkemesinde şikâyet etmege niyetlene. Aq qorçalayıcınıñ alı bir qarar.
Aprelniñ 25-nde saba saat 7-lerde Cepparovnıñ evinde tintüv başladı. Evde ömür arqadaşı ve 14 yaşında qızı bar edi. Cep telefonları alındı ve advokatnı çağırmağa izin bermediler. Tintüvden soñ Rusiye uquq qoruyıcıları qırımlı cemaatçını tutıp aldı.
Edem Semedlâyev Qarasuvbazarda FSB, «E Merkeziniñ» (Rusiye İç işler nazirliginiñ ekstremizm ile küreş baş idaresi) idarelerini ziyaret etti, anda Cepparov ketirilmedi, dep aytıldı. Diger advokat Refat Yunus Rusiye İç işler nazirliginiñ idaresini ziyaret etti, anda aynı cevap berildi. Cepparovnıñ imayesi ğayıp olğanına dair ariza berdi.
Abdureşit Cepparov ilk sefer tutulmay. Bıltır mart ayında da evi tintilgen edi. Bundan soñ Rusiye kontrolindeki Qarasuvbazar rayon mahkemesi aq qorçalayıcı ve qırımtatar milliy areketiniñ veteranını apiske alğan edi. O vaqıt Cepparov içtimaiy ağlarda «natsist atributikasınıñ ve timsalleriniñ propagandası» qabaatı ile 15 künge apiske alınğan edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
