Rusiye ordusını itibardan tüşürgeninde qabaatlanğan aq qorçalayıcı Abdureşit Cepparovnıñ davası boyunca mahkeme oturışuvı şaat kelmegeni içün başqa künge avuştırıldı, dep haber ete «Qırım esnası».
Qayd etilgenine köre, Rusiye Federatsiyası kontrolindeki Kiyev rayon mahkemesinde protokol tizilgende olğan dep aytılğan ekinci şaatnı sorğuğa çekmege planlaştırğan edi. Lâkin şaat kelip olamay dep, oturışuv iyünniñ 7-ne qaldırıldı.
Aynı vaqıtta Kiyev rayon mahkemesiniñ qadısı Denis Didenko aq qorçalayıcığa qarşı daa bir memuriy uquq bozuvları protokolını baqtı ve davanı Qarasuvbazar rayon mahkemesine yollamağa qarar berdi.
Rusiye uquq qoruyıcıları Abdureşit Cepparovnı aprelniñ 25-nde saba evinde tintüv keçirgen soñ tuttı. Evinde ömür arqadaşı ve 14 yaşında qızı bar edi. Cep telefonları alındı ve advokatnı çağırmağa izin bermedilr,
Rusiye kontrolindeki Qırımnıñ Qarasuvbazar rayon mahkemesi onı «poliske riayet etmegeni» içün (Rusiye Memuriy uquq bozuvları kodeksiniñ 19.3 maddesi) 12 künge apiske aldı.
Abdureşit Cepparov ilk sefer tutulmay. Bıltır mart ayında da evi tintilgen edi. Bundan soñ Rusiye kontrolindeki Qarasuvbazar rayon mahkemesi aq qorçalayıcı ve qırımtatar milliy areketiniñ veteranını apiske alğan edi. O vaqıt Cepparov içtimaiy ağlarda «natsist atributikasınıñ ve timsalleriniñ propagandası» qabaatı ile 15 künge apiske alınğan edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
