Aq qorçalayıcı ve qırımtatar areketiniñ veteranı Abdureşit Cepparov Kezlev vaqtınca tutuv izolâtorında 15 kün memuriy apiste qalacaq. Bu aqta «Qırım birdemliginiñ» koordinatorı Mustafa Seydaliyev bildirdi.
Rusiye kontrolindeki Qarasuvbazar rayon mahkemesi Cepparovnı içtimaiy ağlarda «natsist alâmetleri ya da timsalleriniñ propagandasında» qabaatlap, 15 künge apiske aldı.
Cepparov 2019 senesi avgust ayında idare etken saifesinde «natsist timsalleri numayış etilgen» beş daqqalıq bir video derc etilgeninde qabaatlandı. Aq qorçalayıcı mahkemege videonıñ maqsadı propaganda degil edi, dep ayttı.
Advokat Emine Avamileva apis qararını şikâyet etmege niyetlene.
Martnıñ 16-nda saba Rusiye uquq qoruyıcıları Qarasuvbazarda aq qorçalayıcı, qırımtatar areketiniñ veteranı Abdureşit Cepparovnıñ evinde tintüv keçirdi. Cepparovğa advokatlar kirsetilmedi. Tintüvden soñ Rusiye uquq qoruyıcıları Cepparovnı Qarasuvbazar rayon polis bölügine alıp ketti. Rusiye uquq qoruyıcıları tintüv ve sebepleri aqqında resmiy şekilde bildirmey.
Qırımtatar faalleriniñ bildirgenine köre, martnıñ 16-nda saba aq qorçalayıcı Abdureşit Cepparovnıñ evinde keçirilgen tintüv vaqtında tutulğan qırımtatarlar Muhammed Ali Cepparov ve Fevzi Yakubovnıñ bulunğan yeri belli degil edi. Soñra belli olğanına köre, olar Qarasuvbazar rayon bölüginde buluna. Advokat Emil Kurbedinov olarğa uquqiy mesleat yapması içün kirsetilmedi.
Ukraina Tış işler nazirligi ve Ukraina prezidentiniñ Qırım Muhtar Cumhuriyetindeki temsilciligi üç qırımtatarını azat etmege çağırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1lynpf6ndesae.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
