Avgustnıñ 24-nde Bağçasaray ve Bağçasaray rayonında Rusiye uquq qoruyıcıları tarafından tutulğan qırımlı faal Abdulmecit Seytumerovnı Aqmescit SİZO-2-den Aqmescit psihiatrik hastahanesine avuştırıldı, dep haber ete «Qırım birdemligi» cemaat birleşmesi.
Advokat Emil Kurbedinovnıñ fikirince, apiske alınğan qırımlı faaller psihiatrik ekspertizağa yollanıla ve neticede sağlam tanıla. Kurbedinovnıñ qayd etkenine köre, böyle davalarnıñ ekspertizalarında ihtiyac yoq ve olar sebepsiz ola.
«Qanunğa köre, belli cinaiy davalarda böyle ekspertizalarnıñ keçirilüvi mecburiy ola. Ya da mabüsniñ psihiatrik hastalıqları ola bile dep tahmin etmek içün bir sebep olsa, amma bizim vaziyette – bir şey yoq. Böyle hastahanelerde olması «ceza tibbiyeti» ola – mabüslerimizge qarşı basqı usullarından biri», – dep bildirdi advokat «Qırım birdemligine».
Kurbedinov hastahanede Seytumerov 20-25 kün qalacaq, dep qoştı.
Avgustnıñ 24-nde Bağçasarayda ve Bağçasaray rayonında Rusiye uquq qoruyıcıları qırımtatarlar Ruslan Asanov, Seydamet Mustafayev, Remzi Nemetulayev, Abdulmecit Seytumerov, Amethan Umerov ve Eldar Yakubovnıñ evlerinden tintüv keçirdi. Bundan soñ olarnı Aqmescitteki FSB binasına alıp ketkenler. Avgustnıñ 25-nde Rusiye mahkemesi olarnı eki ayğa SİZOğa yolladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
