Amerika Birleşken Devletlerinde mayısnıñ 28-ne qadar 100 442 insan COVID-19 hastalığından vefat etti. Bu aqta Johns Hopkins Universiteti bildire, dep haber ete Azatlıq Radiosı.
Al-azırda ABD hastalıqtan ölgenlerniñ sayısı 100 biñden çoq olğan yekâne memlekettir.
Memlekette aman-aman 1,7 million COVID-19 hastası qayd etildi.
Umumen dünyada 5,7 mln koronavirus hastası qayd etildi, 355 biñden çoq insan vefat etti. 2,3 mln kişi tüzeldi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
