ABD Devlet departamenti Amerika vizasını aluv yañı qaidelerini kirsetti. Onı alacaq olğan şahıslar içtimaiy ağlardaki saifeleri aqqında malümat, soñki beş yıl devamındaki cep telefonları nomeralarını bermek kerekler, dep haber ete Azatlıq Radiosı.
Qaidelerniñ deñiştirilüvi «terrorist ve diger telükeli şahıslarnı tapıp», olarnıñ memleketke kirsetilmemesinen bağlı.
Devlet departamentiniñ vekili bildirgenine köre, muracaat etken kişi içtimaiy ağlarnı qullanmağanını bildire bile, lâkin teşkerüv vaqtında yalan aytqanı belli olsa, onı «ciddiy aqibetler» bekley.
Eskiden içtimaiy ağlardaki malümatlar tek qoşma teşkerüvlerden keçken şahıslardan talap etile edi.
Şimdi turist, student ya da iş vizası içün vesiqalarnı bergen er kes bu malümatnı bermek kerek. Diplomatlar ve resmiy eyyet azaları içün istisna yapıla.
