Türkiyede Rusiye ve ABD eyyetleriniñ mesleatları başlandı. Eki memleketniñ Tış işler müessiseleri laf Moskva ve Washingtonda diplomatik missiyalarnıñ işini normalleştirüv aqqında kete, dep bildirdi.
Muzakereler İstanbuldaki Rusiye Baş konsullığında keçirile. Rusiye eyyetini mesleatlarda Washingtondaki elçi Aleksandr Darçiyev, Amerika eyyetini ise Avropa ve Avrasiya işleri devlet kâtibiniñ yardımcı muavini Sonata Koulter temsil ete.
İstanbuldaki mesleatlarnıñ ekinci raundı ola, keçken raund fevralniñ soñunda ABD baş konsullığınıñ binasında keçti.
«Ukrayina kün tertibinde degil, mesleatlarnıñ kün tertibinde degil», – dep ayttı devlet departamentiniñ vekili Temmi Brüs. Onıñ qayd etkenine köre, laf umumen eki taraflı munasebetlerniñ normalleştirilüvi aqqında ketmeycek, diplomatlar elçihanelerniñ normal işini ğayrıdan tiklev meselesine diqqat ayıracaq. Soñki yılları elçihane işi diplomatik missiyalarnıñ hadimleri sürgün etilgen ve çeşit sıñırlavlar kirsetilgen soñ bayağı sıñırlanğan edi.
ABDde Rusiye diplomatları qullanğan bir sıra mülk buzlatıldı, olarnıñ arasında San-Frantsisko ve Sietldeki konsullıq, Washington ve New Yorkta ticaret temsilciliginiñ binaları, diplomatlar raatlıq içün qullanğan eki memleket mülki de bar. Rusiyede Rusiye akimiyetiniñ israrlığınen ABDniñ Sankt-Peterburgtaki Baş konsullığı qapatıldı, ABD qoyğan sıñırlavlar sebebinden hadimler yetişmegeni sebebinden Vladivostok ve Yekaterinburgtaki konsullıqlarnıñ işini toqtatmağa mecbur oldı. ABDniñ Moskvadaki elçihanesi Rusiye vatandaşlarına viza berüvini toqtattı.
Donald Trump prezident vazifelerine başlağan soñ ABD vekilleri çeşit seviyelerde Rusiye temsilcilerinen körüşken edi – keçken memuriyet vaqtında böyle bağlar pek siyrek edi. Trump aytqan esas maqsat – Ukrayinada barışıq ya da eñ azından ateşkes – şimdilik irişilmedi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
