Avropa Birligi Tış işler naziri Josep Borrell ve ABD Devlet kâtibi Antony Blinken, Londonda G7 Tış işler nazirleriniñ tplaşuvı çerçivesinde ekitaraflı aytışmalar keçirdi. Diger müim halqara meseleler arasında telükesizlik ve rus ordusınıñ Ukraian sıñırları yaqınlarında ve işgal etilgen Qırımda toplanmasını da muzakere ettiler. Bunı mayısnıñ 4-nde Avropa Tış faaliyet hızmetiniñ saytı haber etti.
«AB Yuqarı temsilcisi – Avropa Şurasınıñ vitse baş naziri Borrell ve Devlet kâtibi Blinken ABD-niñ Ortaq ertaraflı faaliyeet planına qaytması ve onıñ tam ve semereli amelge keçirilmesini temin etmesini köz ögüne alıp, Ertaraflı faaliyet planı – İran ile özek añlaşması etrafında yapılğan aytışmalarda soñ inkişaflarnı muzakere ettiler. Bundan ğayrı, qanunsız terzda işğal etilgen Qırımda ve Ukraina ile sıñırlarda soñ vaqıtta Rusiye arbiy bulunmasınıñ artması sebebinden Rusiye ile munasebetlerni de muzakere ettiler», – dep yazlıa bildirmede.
Nevbetteki AB-ABD sammiti iyün yayında olmaq kerek.
Aftanıñ başında Londonda G7 Tış işler nazirleriniñ toplaşuvı olıp keçti. Olar halqara siyasetiniñ eñ müim suallerini muzakere ettiler.
Aprelniñ 22-nde, Rusiye Mudafaa nazirligi Qırımda «çeşitler arası talimlerni» keçirdi. Anda Rusiye arbiy müessisesiniñ yolbaşçısı Sergey Şoygu keldi. O, Cenübiy ve Ğarbiy arbiy okruglarında arbiy talimlerni yekünlemek qararını aldı ve ordular daimiy qaluv yerlerine qaytacaq, dep ilân etti. Qayd etilgenine köre, ordular mayısnıñ 1-ne qadar keri çekilmeli.
Soñki aftaları Ukraina ve ğarbiy ittifaqdaşları 2014 senesinden berli Ukrainanıñ şarqiy sıñırlarında, işğal etilgen Qırımda, Qara ve Azaq deñizlerinde Rusiyeniñ asker sayısı iç olmağanı qadar arta, dep bildire. Moskva, Rusiye ordusınıñ Rusiyede (olar Ukrainağa ait Qırımnı da sayalar) areket etmesi diger memleketlerni, hususan Ukrainanı qasevetlendirmemeli, dep qayd ete.
Qırımnıñ askeriyleştirilüvi
2014 senesi Qırım işğal etilgen soñ Rusiye yarımadada ve Qara deñizde muntazam sürette arbiy talimler keçire, arbiy tehnikanı, hususan uçaqquvar mudafaa sistemasını ketirip qoya.
2018 senesi yanvar ayında Fiolent burnunda S-400 Rusiye uçaqquvar-raketa kompleksleri arbiy nevbetçilikke başladı. Sentâbr ayında bunıñ kibi kompleksler Kezlevde de yerleştirildi. 2018 senesi noyabrniñ soñunda ise Canköyde S-400 uçaqquvar-raketa kompleksiniñ dörtünci divizionı arbiy nevbetçilikke başladı.
Ukraina Baş ştabı, Rusiye arbiyleriniñ Qırımda yapqanlarını qanunsız dep adlandıra.
Ukrainanıñ BM daimiy vekiliniñ muavini Yuriy Vitrenko, Rusiye yarımadada nükleer silâsını yerleştirgeninden qorqqanını bildirdi. Ukraina Milliy telükesizlik ve mudafaa şurasınıñ kâtip muavini Serğiy Krıvonis, Qırımda nükleer silâsı olması mümkün bir qaç yer bar, dep bildirdi. Onıñ fikirince, onıñ yarımadada yerleştirilüv ihtimali «ğayet büyüktir».
2020 senesi dekabr ayında Kreml temsilcisi Dmitriy Peskov Rusiyeniñ Qırımda «telükesizligi içün er şey yapmağa aqqı bar», dep bildirgen edi.
BM Baş Assambleyası 2019 senesi dekabr ayında Rusiyeni işğal etilgen Qırımdan ordusını çıqarmasına ve Ukraina topraqlarınıñ vaqtınca işğalini toqtatmasına çağırğan qararnı qabul etti.
