ABD Qırımnı Rusiye tarafından büyük bir arbiy bazağa ketirilgen Ukrayina toprağı olaraq saya ve Ukrayina tarafınıñ Qırım yarımadasındaki Rusiye arbiy obyektlerine darbe endirmesine qarşı degil. Bunı ABD Devlet kâtibiniñ muavini Viktoriya Nulad bildirdi.
"Ukrayinlerniñ qısqa, orta ya da uzun müddetli istiqbalde qayda cenekleşeceklerini ya da Qırım aqqında ne qarar bereceklerini evelden qıymetlendirmeycegim, amma Qırımnıñ Ukrayina olğanını tanıymız", - dep qayd etti Nuland.
O, yarımadanıñ işğalinden deral soñra Rusiye akimiyeti insan aqlarınıñ kütleviy şekilde bozıp, qırımtatarlarnı ve işğalge qarşı olğanlarnı taqip etmege başlağanını hatırlattı. Bundan ğayrı Rusiye yarımadanı Ukrayinanıñ dişer topraqlarına keniş ücümge başlamaq içün qullanılğan büyük arbiy bazağa çevirdi.
Onıñ sözlerine köre, Rusiyeniñ qırımdaki arbiy bazalarını Ukrayina Silâlı quvetleri içün qanuniy nişanlar kibi saymaq mümkün. Nuland Qırım eñ azından silâdan arındıralmasa Ukrayinanıñ telükesizligi olmaycağını qayd etti.
Rusiye 2022 senesi fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
