ABD, Rusiyeniñ Kursk vilâyetinde ukrayin ameliyatına baqmadan, Rusiye Federatsiyasınıñ territoriyasına Amerika silâsınıñ uzaq mesafeli darbelerine qarşı öz siyasetini deñiştirmedi
"Olarnıñ arbiy ameliyatları aqqında aytacağım şey yoq. Olar (ukrayinler) öz suveren toprağını artıq eki yıldan berli körgenimiz Rusiye istilâsından qorçalaylar. Bizim siyasetimiz deñişmedi. Buña qoşmağa iç bir şeyim yoq", — dep bildirdi Beyaz evniñ spikeri Karin Jan-Pyer.
Pentagon da bildirdi ki, "cebe meydanında ya da Rusiyede silâ qullanuv siyasetinde deñişmeler olmadı".
Ukrayina, ğarbiy ortaqlarını, olarnıñ silâsını Rusiye territoriyasınıñ terenlerine ücüm etmek içün qullanmağa ruhset bermege defalarca çağırğan edi. Bu sıñırlavlarnıñ lâğu etilmesine, şu cümleden, Frenkistan prezidenti Emmanuel Makron ve NATO baş kâtibi Yens Stoltenberg qol tuttılar. Lâkin, misal içün, ABD, Almaniya bunı yapmaqnı red eteler.
Rusiye kütleviy haber vastaları, blogerler ve akimiyet vekilleriniñ malümatına köre, Ukrayina ordusı avgustnıñ 6-nda Rusiyeniñ Kursk vilâyetine kirdi. O vaqıttan berli regionda uruşlar devam ete. Rusiye Federatsiyasınıñ Kursk, Bryansk ve Belgorod vilâyetleriniñ akimiyeti regionlarda kontrterroristik ameliyat rejimini tayin etti.
Avgustnıñ 13-nde TİN, Ukrayina Rusiye Federatsiyasınıñ Kursk vilâyetinde topraqlarnı zapt etmek istemey, ukrayinlerniñ ayatını qorumaq ve Rusiye darbelerinden qorunmaq istey, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
