ABD ve Halqara tedqiqat ve deñişüv şurası (IREX) Ukrainada memleket içinde köçip kelgen insanlarnı birleştirmek içün eki million dollarlıq programmanı başlattı, dep bildirdi ABD Ukraina elçihanesi, dep haber ete Azatlıq Radiosı.
«Birleşken Devletler IREXintl ile beraber eki million dollarlıq eki yıllıq programmanı başlatmaqtan şeref duya. Onıñ maqsadı Ukrainanıñ memleket içinde köçip kelgen insanlarını birleştirmek ve Rusiye istilâsı ögündeki içtimaiy dayanıqlığını pekitmektir», – dep aytıla elçihaneniñ Twitter haberinde.
İçtimaiy siyaset nazirliginiñ malümatına köre, Ukrainada noyabrniñ 10-na qadar vaqtınca işğal etilgen Donetsk ve Lugansk rayonlarından ve işğal altındaki Qırım ve Aqyardan köçip kelgen 1458050 insan qayd etildi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
