ABD Ukraina elçihanesiniñ fikirince, Rusiye, qırımlı advokat Lilâ Gemecini işğal altındaki Qırımda cinaiy esnaslardaki adaletsizlikni aydınlatıp muvaffaq olğanı içün taqip ete. Bu aqta elçihaneniñ Twitter haberinde aytıla.
«İşğal etilgen Qırımdaki sahte esnaslarda adaletsizlikni köstergen advokat Gemeciniñ muvafaqiyetleri sebebinden Rusiye oña qarşı Qırım «mahkemesiniñ» taraflı qararlarnı onı çetleştirmek içün çıqara. Qırımdaki insan aqları uquqçılarınıñ müim işlerini yapmağa imkânları olmalı», – dep aytıla haberde.
Rusiye mahkemesi Gemecige qarşı «mahkeme oturışuvlarınıñ reglamentini çoq bozğanı içün» şahsiy qarar çıqardı.
Gemeciniñ fikirince, bu şahsiy şikâyet – oña müvekkilini cinaiy davada faal qorçalağan imayecige olaraq yapılğan basqı şeklidir. O, mahkemede qırımlı aq qorçalayıcı ve «Qırım birdemligi» cemaat birleşmesiniñ koordinatorı Server Mustafayevniñ menfaatlarını temsil etti. Mustafayev 2020 senesi sentâbrniñ 16-nda 14 yıl sert rejimli koloniyada qalmasına üküm etildi. Faal Amnesty International tarafından vicdan mabüsi olaraq tanıldı.
Ukraina Tış işler naziriniñ birinci muavini Emine Ceppar Cenübiy okrugınıñ arbiy mahkemesiniñ Lilâ Gemecige qarşı çıqarğan qararını «aq qorçalayıcılarğa qarşı basqı» dep adlandırdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
