Link açıqlığı

Saatnıñ esas haberi

ABD Ukraina elçihanesi: 5 yıl evelsi Rusiye Qırımda sahte «referendumnı» keçirdi


Amerika Birleşken Devletleriniñ Ukraina elçihanesi ABD Qırımda Kremlniñ kontrolini iç bir vaqıt tanımaycağını bildirdi. Elçihanede hatırlatqanlarına köre, beş yıl evelsi Rusiye yarımadada «sahte referendum» keçirdi.

«ABD Arbiy-deñiz quvetleriniñ «Donald Kuk» gemisi Odesağa kelgende fikrimizni ayttıq – ABD Ukrainanıñ devlet sıñırları ve topraq bütünligine qoltuta», – dep aytıla ABD Ukraina elçihanesiniñ haberinde.

Bundan evel Türkiye Tış işler nazirligi, resmiy Ankara 2014 senesi martnıñ 16-nda Qırımda keçirilgen «referendumnı» tanımay ve Ukraina topraq bütünligine qoltutqanını daa bir kere tasdıqlay, dep bildirgen edi.

2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG