Reuters agentligi çeçek ayınıñ 25-nde ABD prezidentiniñ mahsus temsilcisi Stiv Uitkoff tarafından Avropa memleketleriniñ eyyet azalarına çeçek ayınıñ 17-nde Pariste Ukrayinada barışıq qurulışına bağışlanğan körüşüvde taqdim etilgen vesiqanıñ metnini derc etti.
Agentlik metinni deñiştirmegen şekilde derc etkenini qayd ete. Resmiy olaraq onıñ aqiqiyligi tasdıqlanmağan. Daa evel çeşit matbuat vastaları menbalarğa atıf etip, plannıñ bir sıra maddeleri aqqında bildirgen ediler, Reutersniñ metni olarnıñ haberlerini tasdıqlay.
Metinde bu, Ukrayina ve Rusiyege Birleşken Devletlerniñ "soñki teklifi" olğanı aytıla.
ABD tarafından teklif etilgen şartlar arasında, taraflar arasında daimiy barışıq ve tehnikiy mesleatlarnıñ başlanması bar. Vesiqada aytılğanı kibi, Ukrayina "Avropa devletleri gruppası ve Avropa devletleri olmağanlar"dan telükesizlik kefaletlerini alacaq. Ukrayina NATO-ğa qoşulmaqtan vazgeçmeli, amma Avropa Birligine qoşulmağa tırışa bile.
Bundan ğayrı metinde aytıla ki, ABD Rusiye tarafından işğal etilgen Qırım üzerinde Rusiye nezaretini de-yure tanıy. Yani Ukrayina tarafından degil de, ABD tarafından tanılmaqta. Bunıñ ile añlatılmay ki, halqara toplulıq tarafından tanılmağan Qırım üzerindeki Rusiyeniñ nezaretini ABD nasıl tanıy bile.
Bundan ğayrı, Rusiyeniñ Lugansk vilâyeti ve Herson, Zaporojjâ ve Donetsk vilâyetleriniñ Rusiye kontrolindeki qısımlarını ABD de-fakto tanıy, Rusiye Harkiv vilâyetinden ordusını çıqarmalı. Vesiqada qayd etilgenine köre, Ukrayina Zaporojjâ AES-ni de qaytarmalı, amma onı ABD idare etecek, eki taraf arasında elektrik energiyasını paylaşacaq. Bundan ğayrı, Ukraina Dnipro boyunca gemiler yürüşiniñ serbestligini ve Kınburn beli üzerine nezaretini almalı.
Vesiqada Rusiyege qarşı sanktsiyalarnıñ lâğu etilmesi ve Ukrayinanıñ bütünley ğayrıdan tiklenmesi, em de maliyeviy tazminatınıñ berilmesi aqqında söz yürsetile.
Ukrayina prezidenti Volodımır Zelenskıy, Ukrayina uzlaşmağa ketmege azır olsa da, de-yure topraqlardan, şu cümleden Qırımdan vazgeçmege azır degil, dep defalarca aytqan edi.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
