Cumhuriyet firqasından senator Lindsey Graham Kyiv ziyareti vaqtında 2024 senesi ABD Ukrayınağa Keriç (Qırım) köprüniñ yoq etilüvi içün ATACMS raketalarını yollaycaq, dep ümüt etkenini bildirdi. Bu aqta o, martnıñ 18-nde aqşam Kyivdeki brifingde bildirdi.
Senatornıñ aytqanına köre, ATACMS raketaları «daa tünevin» Ukrayınada olacaq edi.
«Ümüt etem ki, 2024 senesi Amerika Ukrayınağa pek kerek olğan silâ yollar, ve ileride tek topraqlarıñıznı tutmağa degil, rusiyelilerge basqı yapıp başlarsıñız, ATACMS alıp, Qırımnı Rusiyenen birleştirgen köpürni yoq etersiiñiz. 2024 senesi Ukrayına arbiyleri içün keyfiyetli üstünlik yılı olsun isteyim», – dep ayttı Cumhuriyet firqasından senator Lindsey Graham.
Bundan ğayrı, senator bu yıl Ukrayına ordusında F-16 uçaqlarını «körmege ister edi», dep bildirdi.
2024 senesi F-16 olsun ister edim. Rusiyeliler daa küçlü Ukrayına ordusını körsin isteyim. Ukrayına halqı şimdi seferberlik islâatını keçirsin isteyim», – dedi senator.
Keriç köprü işğal altındaki Qırımnı Rusiyenen bağlay. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde Keriç köpründe oldı. Rusiye arbiyleri köpürni yarımadada arbiy birleşmelerniñ temin etilüvi içün qullana: silâ taşığan eşelonlar Rusiye Mudafaa nazirliginiñ resurslarında derc etilgen edi; bu trenler içtimaiy ağlarnıñ qullanıcıları tarafından da paylaşılğan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
